काठमाडाैं । प्रमुख प्रतिपक्षी नेपाली कांग्रेसले प्रधानमन्त्री पुष्पकमल दाहाल प्रचण्डले उपप्रधान तथा गृहमन्त्री लामिछानेकाे विषयमा दिएकाे जवाफ चित्तबुझ्दाे नभएकाे बताएकाे छ ।
मंगलबार बसेकाे प्रतिनिधि सभा बैठमा प्रधानमन्त्रीले सांसद्का प्रश्नकाे जवाफ दिएलगत्तै कांग्रेस सांसद्ले उठेर विराेध जनाएपछि सभामुख देवराज घिमिरेले कांग्रेस प्रमुख सचेतक रमेश लेखकलाई बाेल्न समय दिनुभयाे ।
गृहमन्त्री रवि लामिछानेकाे विषयमा पर्याप्त प्रमाण हुँदाहुँदै पनि प्रधानमन्त्रीले प्रमाण छैन भनेर जवाफ दिनु गलत भएकाे प्रमुख सचेतक लेखकले बताउनुभयाे । लामिछाने विरुद्ध अत्यन्तै पर्याप्त प्रमाण रहेका भन्दै उहाँले छानबिनका लागि संसदीय समिति बनाउनुपर्ने अडान लिनुभयाे ।
पीडितकाे कुरा, जाहेरी र स्वयम् लामिछानेले हस्ताक्षर गरेकाे सरकारी कागजात प्रमाण भएकाे भन्दै उहाँले प्रमाण के हाे भन्ने सदनमा स्पष्ट पार्नुपर्ने बताउनुभयाे । यस विषयमा निष्पक्ष अनुसन्धान हुनुपर्ने भन्दै प्रमुख सचेतक लेखकले प्रधानमन्त्री नै अध्याराेमा बस्ने हाे भने कसरी निष्पक्ष अनुसन्धान हुन्छ भन्ने प्रश्न गर्नुभयाे ।
प्रमाण भएकाे र नभएकाे भन्ने विषयमा सदनमै छानबिन समिति बनाउन समेत उहाँले माग गर्नुभयाे । यसअघि प्रश्न उठेपछि रामशरण महत, शेरबहादुर तामाङ र गाेकुल बाँस्काेटाले राजीनामा दिएकाे प्रसंग सुनाउँदै प्रमुख सचेतक लेखकले भरतमाेहन अधिकारी र विष्णु पाैडेलले बजेट प्रस्तुत गर्दा छानबिन समिति गठन भएकाे बताउनुभयाे । करका दर हेरफेरकाे आराेप लागेपछि तत्कालीन अर्थमन्त्रीले राजीनामा दिएकाे पनि उहाँले स्मरण गराउनुभयाे ।
गृहमन्त्रीकाे राजीनामा नआउने हाे भने सरकारले नै सदन अवरुद्ध गरेकाे ठहर हुने भन्दै लेखकले कांग्रेस सदन अवरुद्धकाे पक्षमा नरहेकाे बताउनुभयाे ।
