काठमाडाैं । प्रमुख प्रतिपक्ष दल नेपाली कांग्रेसले सहकारी ठगी काण्डबारे उपप्रधान तथा गृहमन्त्री रवि लामिछानेमाथिकाे अडान आज पनि दाेहाेर्याएकाे छ ।
बुधबार बसेकाे प्रतिनिधि सभा बैठककाे आकस्मिक समयमा बाेल्दै कांग्रेस सांसद् ईश्वरीदेवी न्यौपानेले गृहमन्त्रीमाथि संसदीय छानबिन समिति बनाएर छानबिन गर्नैपर्ने बताउनुभयाे । गृहमन्त्री लामिछानेमाथि छानबिन गर्न आगामी बैठकसम्म संसदीय छानबिन समित गठन गर्न समेत उहाँले अल्टिमेटम दिनुभयाे ।
कांग्रेसले गृहमन्त्रीकाे राजीनामा मागेकाे समेत स्मरण गराउँदै सांसद् न्याैपानेले आगामी बैठकमा संसदीय छानबिन समिति गठन नभए बैठक चल्न नदिने चेतावनी दिनुभयाे । सदन अवराेध सरकारले गरेकाे ठहरिने बताउँदै उहाँले भन्नुभयाे - 'आउँदाे सदनमा सरकार पक्षले समिति बनाउन मानेन भने हामीले याे सरकारलाई सदन चाहिएकाे रहेनछ भन्ने पुष्टि हुनेछ ।'
गृहमन्त्रीबारे प्रधानमन्त्री पुष्पकमल दाहाल प्रचण्डकाे जवाफ गलत रहेकाे र प्रधानमन्त्रीकाे जवाफले पीडितमाथि नै घात भएकाे सांसद् न्याैपानेले बताउनुभयाे । प्रधानमन्त्रीले गृहमन्त्रीमाथि सहकारी ठगीबारे कुनै प्रमाण नभएकाे बताउनुभएकाे तर आफूहरुसँग पर्याप्त प्रमाण भएकाे उहाँले बताउनुभयाे ।
गृहमन्त्रीकाे विषयमा कुनै रकम नलिएकाे र लिएकाे रकम फर्छाैट भइसकेकाे भनेर दुईथरी अभिव्यक्ति दिनुभएकाे भन्दै सांसद् न्याैपाने यसले झन् आशंका बढेकाे बताउनुभयाे । 'प्रधानमन्त्रीले संसदभित्र र जवाफ दिनु अगाडि संसद् बाहिर जसरी बोल्नुभयो, पेट काटेर चार-चार पैसा गरेर जम्मा गरेका, तपाइँ स्वयंलाई प्रत्यक्ष भेटेर पीडा पोखेका पीडितप्रतिको बेइमानी र घात होइन ? राज्यको कानुनप्रतिको खेलवाड होइन यो ? प्रधानमन्त्रीले बोल्नुभयो हिजो केही प्रमाण छैन, केही हिनामिना छैन, हामीसँग प्रयाप्त प्रमाण छ, उही केसमा १ जना दीपेश पुन पक्राउ पर्ने, अरु पक्राउ पर्ने, ऊ (गृहमन्त्री) नपर्ने ? उहाँले गृहमन्त्रीको पद खाइराख्नुपर्ने, हामीले हेरिराख्नु पर्ने ?'-
गृहमन्त्री लामिछानेले संसद् बाहिर प्रमुख प्रतिपक्षले ४ वर्ष सदन अवरुद्ध गर्दै जाओस् हामी काम गर्छाैं भनेर गैरजिम्मेवार अभिव्यक्ति दिएकाे भन्दै सांसद् न्याैपानेले आपत्ति जनाउनुभयाे ।
गृहमन्त्री यसअघि नियुक्त हुँदा २ वटा नागरिकताकाे काण्ड र अहिले सहकारी काण्डमा मुछिनुभएकाे भन्दै उहाँले आराेपकाे घेरामा घेरिएकालाई गृहमन्त्री पद किन चाहियाे भन्ने प्रश्न गर्नुभयाे ।
