काठमाडाैं । नेपाली कांग्रेसकी सांसद् रुपमा विकले सरकारकाे पदमा जाने याेग्यता परिवर्तन भएकाे हाे भन्ने प्रश्न गर्नुभएकाे छ ।
बुधबार बसेकाे प्रतिनिधि सभा बैठककाे शून्य समयमा बाेल्दै सांसद् विकले नेपाल प्रहरीकाे केन्द्रीय अनुसन्धान ब्युराे (सीआईबी) प्रमुख श्याम ज्ञवालीमाथि छानबिन गर्न सरकारसँग माग गर्नुभयाे । ज्ञवालीमाथि घूस लेनदेनकाे आराेप लागेकाे र उहाँकाे जन्ममितिमा समेत विवाद देखिएको भन्दै विकले यसबारे छानबिन गर्न माग गर्नुभयाे ।
छानबिन गर्नुपर्ने व्यक्तिलाई नै छानबिन गर्ने निकायको प्रमुख बनाइएको भन्दै उहाँले यस विषयमा प्रधानमन्त्री पुष्पकमल दाहाल प्रचण्डले जवाफ दिनुपर्ने बताउनुभयाे । 'के अब सरकारकाे उपल्लाे तह र सरकारकाे पदमा जाने याेग्यता परिवर्तन भएकाे हाे ? कुनै मुद्दा वा आरोप नलागिकन सरकारी निकायको नेतृत्वमा जान नपाइने नीति बनेको हो ? यदि होइन भने सरकारी निकायहरूमा विवादित र आरोपीहरुलाई किन जिम्मेवारी दिइँदैछ ? हालै सीआईबीकाे जिम्मेवारी पाएका श्याम ज्ञवाली पनि घुस लेनदेनको आरोप र प्रहरी सेवा प्रवेशमा जन्ममिति विवादित बनेको छ, आरोप र विवाद देखिएपछि छानबिन गर्ने हो कि ? छानविन गर्ने निकायकै प्रमुख बनाउने हो ? म प्रधानमन्त्रीबाट जवाफ चाहान्छु, सीआईबी प्रमुखमाथिको आरोप र विवादको निष्पक्ष छानबिन हुन्छ कि हुँदैन ? जवाफ चाहिन्छ'- उहाँले भन्नुभयाे ।
