काठमाडौं । प्रतिनिधि सभा सदस्य सुनिता बरालले अर्थतन्त्र लयमा फर्किएको अनुभूति जनताले गर्नुपर्ने बताउनुभएको छ ।
बुधबार प्रतिनिधि सभा बैठकमा बजेटको सिद्धान्त र प्राथमिकता माथिको छलफलमा बोल्दै निजी क्षेत्रको लगानीलाई सुनिश्चित गर्ने गरी सरकारको बजेट तथा कार्यक्रम आउनु पर्नेमा बरालले जोड दिनुभयो । ‘आर्थिक मोडेल कस्ता हुने, सिद्धान्त र प्राथमिकतामा छुटेको कुरा समेटेर ल्याउनु पर्छ’, उहाँले भन्नुभयो ।
सार्वजनिक ऋणको दायित्व बढाइ राख्ने तर कार्यक्रम प्रभावकारी नहुने कुराले गन्तव्यमा नपुगिने उहाँले प्रष्ट पार्नुभयो । त्यसैले यस विषयमा छलफल गर्नुपर्ने बरालले बताउनुभयो ।
समृद्ध नेपाल, सुखी नेपालीको सङ्कल्प पूरा गर्नको लागि ठोस योजनाका साथ सकारको नीति, कार्यक्रम र बजेट आउनु पर्ने उहाँले बताउनुभयो । यसमा किसान र युवालाई एकीकृत रूपले अघि बढाउने योजना ल्याउन पर्ने उहाँले सुझाव दिनुभयो ।
संविधान कार्यान्वयनलाई जोड दिने हो भने पनि धेरै उपलब्धि प्राप्त हुने उहाँले बताउनुभयो । यस तर्फ सरकारका कार्यक्रम जोडिनु पर्ने उहाँको धारणा छ ।
