काठमाडौं । प्रतिनिधि सभा सदस्य डा. प्रकाशशरण महतले विगतमा स्रोतको सुनिश्चितता नै नगरी ठेक्का लगाउने काम गरिएकोले सरकारको दायित्व बढेको बताउनुभएको छ ।
बुधबार प्रतिनिधि सभा बैठकमा बजेटको सिद्धान्त र प्राथमिकता माथिको छलफलमा बोल्दै महतले अर्थतन्त्रलाई सङ्कटबाट मुक्त गराउने हो भने आर्थिक अनुशासन, मितव्ययिता र प्राथमिकीकरण चाहिने बताउनुभयो । आफूले स्पष्ट मार्गचित्र सहित बजेटको सिद्धान्त र प्राथमिकता प्रस्तुत गरेको उहाँले दाबी गर्नुभयो ।
प्रधानमन्त्री पुष्पकमल दाहालले उपलब्धिको जस चाहिँ आफूले लिएर हुन नसकेको कामको अपजस जति कांग्रेसलाई दिएको भन्दै आपत्ति जनाउनुभयो । आफूले सरकारमा रहँदा आफू र पार्टीलाई प्राथमिकतामा राखे र काम नगरी देश र जनताको पक्षमा काम गरेको उहाँले दाबी गर्नुभयो । आफूले बजेटरी सिस्टममा आएको बेथितिलाई थितिमा ल्याउने काम गरेको महतले दाबी गर्नुभयो ।
महतले काल्पनिक स्रोत देखाएर ठुलो बजेट नबनाउन आग्रह गर्नुभयो । ‘यसले एकछिन सबै खुसी भएको देखिएला, तर यसले दीर्घकालीन दायित्व सिर्जना गर्छ, घोषणा पूर्ति हुँदैन, त्यसपछि टाउकोमा हात राख्नु पर्ला’, उहाँले भन्नुभयो ।
सामाजिक सुरक्षाको ठुलो दायित्व सरकारको काँधमा रहेको प्रति महतले ध्यानाकर्षण गराउनुभयो । दोहोरो सामाजिक सुरक्षा कार्यक्रमलाई नियन्त्रण गर्नुपर्नेमा उहाँले जोड दिनुभयो ।
आफूसँग खर्च कटौतीको स्पष्ट खाका भएको महतले दाबी गर्नुभयो । आफूले विनियोजन कुशलताको योजना ल्याएको उहाँले बताउनुभयो । आफूले लिएको बाटो हिँड्ने हो भने अर्थतन्त्रमा आमूल परिवर्तन हुने महतले दाबी गर्नुभयो ।
रोजगारी र उत्पादनका कुरा अनुदान बाँडेर नहुने उहाँले बताउनुभयो । अब उत्पादनमा अनुदान दिनु पर्नेमा उहाँको जोड छ । अब बेथिति रोक्नु पर्ने महतले बताउनुभयो । आफ्नै वरिपरिकालाई होइन जनतालाई खुसी पार्ने कार्यक्रम ल्याउन उहाँले आग्रह गर्नुभयो ।
अर्थतन्त्रको सुधारका लागि आफूले गरेको काम प्रति महतले गर्व गर्नुभयो । यसमा आफूलाई प्रधानमन्त्रीले धन्यवाद दिनु पर्ने महतले बताउनुभयो । उहाँले प्रधानमन्त्रीलाई आफूले देखाएको बाटोमा हेर्न आग्रह गर्नुभयो । नेपालको बाटो अब आयो भन्ने आफूले देखेको महतले बताउनुभयो । अब नेपालको पालो आउने नआउने कुरा प्रधानमन्त्री र नयाँ गठबन्धनको हातमा रहेको उहाँले बताउनुभयो । ‘हाम्रो पालो आयो’, उहाँले भन्नुभयो ।
