काठमाडाैं । प्रमुख प्रतिपक्षी नेपाली कांग्रेसका सांसद् दिलेन्द्रप्रसाद बडूले उपप्रधान तथा गृहमन्त्री रवि लामिछानेकाे राजीनामा माग्नुभएकाे छ ।
बुधबार सबेकाे प्रतिनिधि सभाकाे राज्य व्यवस्था तथा सुशासन समितिको बैठकमा बाेल्दै सांसद् बडूले सहकारी काण्डकाे अनुसन्धानका लागि गृहमन्त्रीले राजीनामा दिएर सहयाेग गर्नुपर्ने बताउनुभयाे ।
सहकारीको रकम दुरुपयोगको विषयमा व्यापक कुरा उठिरहेको र आफूहरुले यस विषयमा संसद्मा पनि कुरा उठाएकाे उहाँले बताउनुभयाे । 'पोखरा, बुटवल लगायतका सहकारीकाे सायद १० कराेड रकम अन्य प्रयाेजनकाे निमित्त ग्यालेक्सी टिभी लगायतमा आउन हुन्थ्याे कि हुँदैनथ्याे याे छानबिनकाे कुरा हाेला हाे, त्यसमा रवि लामिछाने नाम गरेका व्यक्तिले १ करोड रुपैयाँ लिएको देखिन्छ, ती रवि लामिछाने भन्ने व्यक्ति काे हुन् ? अहिले हाम्रो बीचमा रहनुभएका गृहमन्त्री पनि रवि लामिछाने नै हुनुहुन्छ, तपाइँ हाेइन भने अरु काे हुन् ? म नै हाे भन्ने उहाँलाई लागेकाे छ भने याे छानबिन निष्पक्ष र विश्वसनीय पार्नका निम्ति याे छानबिन सुरु गराइहाल्ने र छानबिन नसकिँदासम्म जिम्मेवारीबाट बाहिर हुनुपर्छ भन्ने हाम्राे अपेक्षा हाे'- सांसद् बडूले भन्नुभयाे ।
सहकारी काण्डमा कति पक्राउ परे कति फरार छ र छानबिन के भइरहेकाे भन्नेबारे स्पष्ट पार्न पनि उहाँले गृहमन्त्रीसँग माग गर्नुभयाे ।
सुन तस्करी काण्डमा छानबिन आयाेगकाे प्रतिवेदन अनुसार दाेषीलाई कारबाही गर्न अहिलेकाे सरकारले तदारुकता देखाएकाेमा भने सांसद् बडूले प्रशंसा गर्नुभयाे ।
बाँसबारी जुत्ता कारखानाकाे जग्गा काण्डबारे विनाेद चाैधरीमाथि छानबिन भइरहेकाे छ भने सभामुख देवराज घिमिरेलाई जानकारी सहितकाे पत्र पठाइएकाे विषयमा उहाँले आपत्ति जनाउनुभयाे । यसरी पत्र पठाउनु कानुन विपरीत भएकाे भन्दै सांसद् बडूले यसबारे गृहमन्त्रीले स्पष्ट पार्नुभयाे ।
