प्रतिनिधि सभाको बैठक आज बस्दैछ ।
संघीय संसद् भवन नयाँ बानेश्वरमा बिहान ११ बजे बस्ने बैठकका लागि विभिन्न ५ वटा सम्भावित कार्यसूची तय गरिएकाे संसद् सचिवालयले जनाएकाे छ ।
बैठकमा अर्थमन्त्री वर्षमान पुनले बैंक तथा वित्तीय संस्था सम्बन्धी पहिलाे संशाेधन विधेयक, २०८० लाई प्रस्तुत गर्न अनुमति माग्ने प्रस्ताव पेस गर्नुहुने कार्यसूची छ । त्यसपछि उहाँले साे विधेयक प्रस्तुत गर्नुहुनेछ ।
यसैबीच उपप्रधान तथा गृहमन्त्री रवि लामिछानेमाथि छानबिनका लागि संसदीय समिति गठनकाे माग गरिरहेकाे कांग्रेसले आजकाे बैठक अवरुद्ध नगर्ने भएकाे छ । सदन अवरोध लगायत विषयमा सभामुख देवराज घिमिरेले शनिबार दलका प्रमुख सचेतकहरुसँग छलफल गर्नुभएकाे थियाे । त्यसक्रममा कांग्रेसले उपप्रधान तथा गृहमन्त्री रवि लामिछानेमाथि सहकारी ठगी प्रकरणमा छानबिन गर्न संसदीय छानविन समिति बनाउनुपर्ने अडान कायमै राखेको थियाे । तर बैठक अवरुद्ध नगर्ने कांग्रेसले बताएकाे थियाे ।
बैठक बस्नुअघि बिहान सवा १० बजे कार्यव्यवस्था परामर्श समितिको बैठक बस्दैछ ।
