काठमाडौं । प्रतिनिधि सभा सदस्य सुशीला श्रीपालीले राजनीतिक संस्कारको नयाँ परिभाषा निर्माण गर्नुपरे बताउनुभएको छ ।
मंगलबार प्रतिनिधि सभा बैठकको विशेष समयमा बोल्दै श्रीपालीले राजनीतिमा कुरा एउटा र काम अर्को गर्न बन्द गर्नुपर्ने बताउनुभयो । राजनीति फोहोरी खेल होइन भन्ने कुरा प्रमाणित गरेर देखाउनु पर्ने उहाँको धारणा छ ।
राजनीति सबै नीतिको मूल नीति हो भन्ने कुरा स्थापित गर्नुपर्नेमा उहाँले जोड दिनुभयो । राजनीति सामाजिक न्याय सहितको सुन्दर परिभाषा हो भन्ने कुरा स्थापित गर्नुपर्ने उहाँको धारणा छ ।
राजनीति संस्कार र परिभाषालाई सभ्यताको रूपमा बदल्न आवश्यक रहेको उहाँले बताउनुभयो । राजनीतिमा महिला, दलित, पछाडि पारिएको पिँधमा रहेको समुदायको हरेक ठाउँमा समान सहभागिता हुनुपर्नेमा उहाँले जोड दिनुभयो । ‘आज दुर्भाग्य वामपन्थी सहितको केही गरौँ भनेर नयाँ ऊर्जा सहित सरकार बनेको छ तर त्यहाँ पनि त्यो अनुहार देख्न पाइँदैन, पात्र को भन्ने विशेष ठुलो कुरा होइन, तर प्रतिनिधि ठुलो कुरा हो, तर दुर्भाग्य आज यो किन चलेन, किन चलेन प्रश्न यहाँ छ’, उहाँले भन्नुभयो ।
श्रीपालीले हुरी बतासले किसानको बालीमा क्षति भएको र आगलागीबाट जनधनको क्षति समेत भएकोलागि सरकारले राहत र क्षतिपूर्तिको व्यवस्था गर्नुपर्ने बताउनुभयो । हेर्दा सामान्य देखिए पनि आगलागीबाट अरबौँ रुपैयाँको क्षति हुने तर्फ उहाँले ध्यानाकर्षण गराउनुभयो । यस्ता घटना न्यूनीकरणको लागि सयमा नै रणनीतिक योजना बनाउन आवश्यक रहेको बताउनुभयो ।
राजनीतिक अस्थिरताका कारण देशमा धेरै गर्नुपर्ने काम हुन नसकेका श्रीपालीले बताउनुभयो । ‘नेपालको राजनीति माथि ठुलो प्रश्न चिन्ह खडा भएको छ कि राजनीतिको उज्वल भविष्य कहिले आउने हो ?’, उहाँले भन्नुभयो ।
नेपाली जनतालाई समृद्धि, सुशासन व्यवहारमा कहिले दिने हो भन्ने प्रश्न नेपाली जनताले गरिरहेका उहाँले बताउनुभयो । नेपाली जनताले धेरै आशा गरेका भए पनि त्यो पुरा गर्न नसकिएको उहाँले बताउनुभयो ।
