काठमाडाैं । राष्ट्रिय स्वतन्त्र पार्टी (रास्वपा) सांसद् स्वर्णिम वाग्लेले उपप्रधान तथा गृहमन्त्रीलाई संसद्मा जवाफ दिन नदिएर नेपाली कांग्रेस असहिष्णु बनेकाे बताउनुभएकाे छ ।
बुधबार बसेकाे प्रतिनिधि सभा बैठककाे विशेष समयमा बाेल्दै सांसद् वाग्लेले गृहमन्त्रीले सदनबाटै जवाफ दिन्छु भन्दा कांग्रेस असहिष्णु र अनुदारवादी देखिएको बताउनुभयाे । केही दिनदेखि सदनमा कांग्रेसले निरन्तर सहकारीको महाकाव्य लेख्ने अनुष्ठान चलाइरहेकाे तर समाधानको कुरा नगरेको उहाँले बताउनुभयाे ।
गृहमन्त्रीले जवाफ दिन चाहान्छु भन्दा पनि कांग्रेसले बाेल्न नदिएकाेमा सांसद् वाग्लेले आपत्ति जनाउनुभयाे । 'उहाँलाई निषेध, याे हदसम्मकाे असुहिष्णुता, याे अनुदारवाद कहाँबाट आयाे ? याे कस्ताे संस्कृति बसाउन खाेज्दैछाैं ?'- उहाँकाे प्रश्न छ ।
विगतमा सबै प्रतिपक्षले तत्कालीन अर्थमन्त्री जनार्दन शर्माकाे राजीनामा माग्दा आफूहरुले पहिला उहाँकाे कुरा सुनाैं भनेर आवाज उठाएकाे भन्दै सांसद् वाग्लेले सबैले भाैतिकमन्त्रीकाे राजीनामा माग्दा पनि आफूहरुले पहिला उहाँकाे कुरा सुन्नुपर्छ भनेकाे स्मरण गर्नुभयाे ।
संसदीय छानबिन समिति बनाउन आफूहरुकाे आपत्ति नरहेकाे तर कस्ताे नजिर स्थापित गर्न गइरहेका छाैं भन्नेबारे विचार गर्नुपर्ने उहाँले बताउनुभयाे । 'आराेप लाग्नासाथ सबले राजीनामा गराैं, मन्त्रीले मात्र हाेइन सांसद्ले पनि राजीनामा गराैं, आराेप लाग्याे जाहेरी पर्याे भने राजीनामा दिने र संसदीय समिति गठन गर्ने याे नजिर स्थापना गर्न हामी तयार हाे ? सर्वदलीय सहमति गराैं, याे हाे भने पहिलाे हस्ताक्षर रास्वपाले गर्नेछ'- सांसद् वाग्लेले भन्नुभयाे ।
बाहिर अनुसन्धान प्रभावित गरिने र राज्यका निकायहरुमा अविश्वास गर्ने कुरालाई संसद्मा प्रवेश गराउने हाे भने सुनदेखि वाइडवडीसम्म. टिकापुरदेखि बालमन्दिरसम्म, शरणार्थीदेखि टेरामक्ससम्म, मनीलण्डरिङदेखि कर छलीसम्म, झण्डा हल्लाउँदै अख्तियार धाएकाेदेखि भ्रष्टाचारमा प्रमाणित नेपाललाई सरकारी खर्चमा शालिक बनाइएका कुरासम्म प्रवेश हुने बताउनुभयाे । यस्ता कुरा संयमित हुन आग्रह गर्दै उहाँले पहिला गृहमन्त्रीकाे कुरा सुन्न कांग्रेसलाई सुझाउनुभयाे । जवाफ चित्त नबुझे संसदीय समितिमा पनि बहस गर्न सकिने उहाँले बताउनुभयाे ।
