काठमाडाैं । नेकपा एमालेका सांसद् योगेशकुमार भट्टराईले माथिल्लो तहमा रहेका कर्मचारी अवकाशपछि तत्काल संवैधानिक अंगमा जाने परिपाटी अन्त्य गर्नुपर्ने बताउनुभएकाे छ ।
बुधबार बसेकाे प्रतिनिधि सभा बैठकमा संघीय निजामती सेवा विधेयकको सैद्धान्तिक पक्षमाथिको छलफलमा भाग लिँदै सांसद् भट्टराईले माथिल्ला तहका कर्मचारीको अवकाशपछि कुलिङ पिरीयड राखेर मात्र संवैधानिक आयोगमा जाने व्यवस्था गरिनुपर्ने र विदेशी संस्थामा काम गर्न निषेध गर्नुपर्ने बताउनुभयाे ।
देशकाे गाेपनीयताकाे ख्याल गर्नुपर्ने बताउँदै उहाँले भन्नुभयाे - 'माथिल्लाे तहका कर्मचारीहरु अवकाशपछि तत्काल कुनै संवैधानिक अंगमा जाने परिपाटी ठिक छैन कुलिङ पिरियड कम्तिमा २ वर्ष हुुनुपर्छ, माथिल्लो तहकाे कर्मचारी अवकाशपछि कुनै विदेशी कम्पनीमा काम गर्छ भने त्यसलाई निषेध गर्नुपर्छ किनभने देशकाे गाेपनीयताकाे कुरा पनि हामीले ख्याल गर्नुपर्छ ।'
तल्लाे तहका कर्मचारीलाई बढी भन्दा आत्मविश्वास बढाउने र व्यवासायिकतातर्फ ध्यान दिनुपर्ने सांसद् भट्टराईले बताउनुभयाे । सांसद् भट्टराईदे ट्रेड युनियनको परिभाषा बदल्नुपर्नै समय आएको भन्दै उहाँले युनियनलाई अब अधिकार भन्दा पनि उत्पादन र प्रतिफलसँग जोड्नुपर्ने बताउनुभयाे ।
