प्रतिनिधि सभाका सभामुख देवराज घिमिरेले सिंहदरबारमा निर्माणाधीन संघीय संसद् भवनको निर्माण सुस्त गतिमा भएको भन्दै असन्तुष्टि जनाउनुभएको छ ।
आइतबार निर्माणाधीन संघीय संसद् भवनको अवलोकन गर्दै सभामुख घिमिरेले सरकारको प्राथमिकतामा परेको आयोजना छिटो बनोस भन्ने चाहना रहेपनि तोकिएको समयमा निर्माण नभएको भन्दै असन्तुष्टि जनाउनुभएको हो ।
उहाँले निर्माणाधीन संघीय संसद् भवन कहिले बन्छ भन्दा पनि आशा गर्ने ठाँउ मात्रै रहेको बताउनुभयाे । सभामुख घिमिरले संसद् भवन निर्माणमा देखिएका समस्या र अप्ठेराहरुलाई समाधान गर्न आफूले पहल गर्ने बताउनुभयो ।
१ वर्षपछि अनुगमनमा आउदा यसअघि जुन गतिमा निर्माण हुनुपर्ने हो त्यसको ५० प्रतिशत मात्रै काम भएको देखिएको उहाँले बताउनुभयो ।
तत्कालीन प्रधानमन्त्री केपी शर्मा ओलीले २०७६ असोज १ गते सिंहदरबारस्थित पुतली बगैँचामा नयाँ संसद् भवन निर्माणको शिलान्यास गर्नुभएको थियो ।
३ वर्षमा निर्माण सक्ने लक्ष्य अनुसार काम सुरु गरेपनि समयमा नै सम्पन्न नभएका कारण पटक पटक म्याद थप गरिँदै आएको छ । १ सय ५१ रोपनी जग्गामा संघीय संसद्का १२ वटा भवन निर्माण गरिएको छ ।
