काठमाडाैं । प्रमुख प्रतिपक्षी नेपाली कांग्रेसले प्रतिनिधि सभा बैठक अवरुद्ध गरेकाे छ ।
उपप्रधान तथा गृहमन्त्री रवि लामिछानेमाथि छानबिन गर्न संसदीय छानबिन समिति गठनकाे माग गर्दै कांग्रेसले मंगलबारकाे बैठक अवरुद्ध गरेकाे हाे ।
मंगलबार बैठक सुरु हुनासाथ कांग्रेसका सांसद्ले उठेर विराेध जनाएपछि सभामुख देवराज घिमिरेले कांग्रेस सचेतक सुशिला थिङलाई बाेल्न समय दिनुभयाे । सांसद् थिङले सहकारी ठगी काण्डमा संसदीय छानबिनका लागि तत्काल संसदीय छानबिन समिति गर्न माग गर्नुभयाे । समिति गठन नभएसम्म बैठक चल्न नदिने चेतावनी उहाँले दिनुभयाे ।
आफूहरूले निरन्तर उठाउँदै आएको कुरा सरकारले नसुनेकाले बाध्य भएर सदन अवरोध गर्नुपरेकाे सचेतक थिङले बताउनुभयाे । गृहमन्त्री लामिछानेले गैरकानुनी काम गरेकाे दाबी गर्दै उहाँले त्यस्ताे काम गर्नेले दण्ड पाउँछ कि पाउँदैन भन्ने प्रश्न गर्नुभयाे । 'सहकारीमार्फत अबौंको रकम अपचलन भएको कुरा आएको छ, सूर्यदर्शनदेखि ६ वटा सहकारीबाट १ अर्ब रुपैयाँ गोरखा मिडिया कम्पनीमा लगाइएको छ, यसरी यो गैरकानुनी काम गर्नेले दण्ड पाउँछ कि पाउँदैन ? गैरकानुनी रुपमा अर्बौं लिँदाको बखत कम्पनीको प्रबन्ध निर्देशक रवि लामिछानेलाई कारबाही हुन्छ कि हुँदैन ? रवि लामिछानेलाई कारबाही हुनुपर्छ कि पर्दैन ? सरकार जवाफदेही हुनुपर्छ कि पर्दैन ?'- थिङकाे प्रश्न छ ।
सरकारले कांग्रेसलाई गलाउनकै लागि समिति गठन नगरेकाे आराेप उहाँले लगाउनुभयाे ।
थिङले बाेलिसकेपछि कांग्रेस सांसद्ले उठेर विराेध जनाएका छन् । सभामुख घिमिरेले रास्वपा सांसद् मनिष झालाई बाेल्नका लागि समय दिएपनि कांग्रेस सांसद्काे हाेहल्लाका कारण झाले बाेल्न पाउनुभएकाे छैन । सभामुखले बस्न आग्रह गरेपनि कांग्रेस सांसद्ले उठेर हाेहल्ला गर्दै विराेध जनाइरहेका छन् ।
कांग्रेस सांसद्ले सत्तापक्षलाई बाेल्न नदिएपछि एमाले र माओवादीका सांसद्ले पनि उठेर विराेध जनाएका छन् ।
