काठमाडाैं । स्वतन्त्र सांसद अमरेशकुमार सिंहले ०४७ सालदेखि सार्वजनिक लाभको पदमा बसेका सबैमाथि निष्पक्ष छानबिन गर्न अधिकार सम्पन्न न्यायिक समिति बनाउनुपर्ने बताउनुभएकाे छ ।
बुधबार बसेकाे प्रतिनिधि सभाको बैठकमा आकस्मिक समयमा बाेल्दै सांसद् सिंहले २०४७ सालपछि कार्यपालिका, व्यवस्थापिका, न्यायपालिका, सुरक्षा निकाय र कर्मचारीतन्त्रमा सार्वजनिक पद धारण गरेकाहरूमाथि निष्पक्ष र न्यायिक स्वतन्त्र छानबिन हुुनपर्ने बताउनुभयाे । '०४७ सालदेखि जो लाभको पदमा बसेको छ, चाहे त्यो कार्यपालिकामा गएको होस्, त्यो न्यायपालिका र व्यवस्थापिकामा नै किन गएको न होस्, सुरक्षा निकायमा हुन् या कर्मचारीतन्त्रमा गएका हुन्, उसको निष्पक्ष, न्यायिक छानबिन हुनुपर्दछ, किनकी देश त्यत्तिकै बर्बादी हालतमा गएकाे हाेइन'- उहाँले भन्नुभयाे ।
देशको आधा बढी पैसा विदेश गएको र आधा बजेट नेता र कर्मचारीले लुटेर राखिरहेका सांसद् सिंहले बताउनुभयाे । संसदीय छानबिनकाे कुनै आवश्यकता नभएकाे भन्दै उहाँले एमाले, कांग्रेस, माओवादी राप्रपा लगायतले मिलोमतो गर्ने काम बन्द गर्नुपर्ने बताउनुभयाे । भ्रष्टाचार र सम्पत्तिकाे छानबिन गर्नका लागि अधिकार सम्पन्न न्यायिक छानबिन समिति बनाएर छानबिन गर्नुपर्ने सांसद् सिंहले बताउनुभयाे ।
भ्रष्टाचार र विदेश हस्तक्षेप नेपालका लागि प्रमुख समस्या रहेका उहाँले बताउनुभयाे ।
देश चारैतिर समस्याग्रस्त रहेकाे भन्दै उहाँले अहिलेकाे मुख्य समस्या भनेकाे देशकाे अर्थतन्त्र भएकाे बताउनुभयाे । अर्थतन्त्रकाे साइज भन्दा सरकारकाे साइज ठूलाे भएकै कारण अर्थतन्त्र सबल बन्न नसकेकाे सांसद् सिंहले बताउनुभयाे ।
अर्थतन्त्र र देश बनाउन तीनै तहका सरकारकाे साइज घटाउनुपर्ने भन्दै उहाँले पूर्व पदहरुकाे नाममा जनताकाे कर लुट्ने काम भएकाे बताउनुभयाे । याे काम बन्द हुनुपर्ने सांसद् सिंहले बताउनुभयाे ।
