काठमाडाैं । नेकपा एमालेका अध्यक्ष केपी शर्मा ओलीले प्रमुख प्रतिपक्षी नेपाली कांग्रेस संसदीय मर्यादामा चल्न नसकेको बताउनुभएकाे छ ।
आइतबार संघीय संसद् भवन परिसर नयाँ बानेश्वरमा सञ्चारकर्मीसँग कुरा गर्दै अध्यक्ष ओलीले कांग्रेसले आक्रोश पीडाले जे पायो त्यही बोलिरहेको र संसदीय मर्यादामा चल्न नसकेको बताउनुभयाे ।
सहमतिसाथ अघि बढ्न एमालेले समन्वयकारी काम गरेको भन्दै उहाँले कांग्रेस तर्कमा आउन नसकेको बताउनुभयाे । जनताको नाम लिएर कांग्रेसले सदनमा आफ्नो कुण्ठा पोख्ने काम गरेको भन्दै अध्यक्ष ओलीले उत्तेजना नभइ संयमित ढंगले विधि अनुसार समाधान खोज्नुपर्ने बताउनुभयाे ।
उहाँले कांग्रेसको विरोधका कारण नभई बजेट तयारीका लागि अहिलेको अधिवेशन अन्त्य गरिएको पनि प्रष्ट पार्नुभयाे । बजेट अधिवेशनका लागि १५ दिनको ग्याप राख्नुपर्ने र जेठ १५ मा बजेट ल्याउनुपर्ने संवैधानिक अवस्थालाई बुझ्नुपर्ने अध्यक्ष ओलीले बताउनुभयाे ।
