काठमाडौं । सरकारले शिक्षकको पारिश्रमिक मासिक रूपमा दिने व्यवस्था मिलाउने भएको छ ।
मंगलबार संघीय संसद्का दुवै सदनको संयुक्त बैठकमा सरकारकाे नीति तथा कार्यक्रम वाचन गर्दै राष्ट्रपति रामचन्द्र पौडेलले शिक्षकको पारिश्रमिक मासिक रूपमा दिने व्यवस्था मिलाइने बताउनुभयाे ।
शिक्षकको सरुवा, बढुवा, कार्यसम्पादन तथा मूल्यांकन तालिम लगायत विषयको वस्तुपरक जानकारी दिने एकीकृत विद्युतीय प्रणाली विकास गरी सञ्चालनमा ल्याइने उहाँले बताउनुभयाे ।
शैक्षिक तालिम केन्द्रकाे वृद्धि गरी शिक्षकको क्षमता र शैक्षिक गुणस्तर बढाइने राष्ट्रपति पाैडेलले बताउनुभयाे । शिक्षकलाई छात्रवृत्ति तथा नेतृत्व विकासका अवसर प्रदान शिक्षण पेसालाई थप गुणस्तरीय, आकर्षक र मर्यादित बनाइने उहाँले बताउनुभयाे ।
माध्यमिक विद्यालयमा अंग्रेजी, गणित र विज्ञान विषयका शिक्षककाे अभाव पूर्ति गर्न विश्वविद्यालयमा अध्ययनरत विद्यार्थीलाई शिक्षण इन्टनसीप पढाउने प्रबन्ध गरिने राष्ट्रपति पाैडेलले बताउनुभयाे ।
शिक्षाशास्त्र संकाय बाहेकका सम्बन्धित विषयमा न्यूनतम याेग्यता हासिल गरी अध्यापन तालिम प्राप्त जनशक्तिलाई शिक्षक सेवामा प्रवेश गर्न पाउने व्यवस्था गरिने उहाँले बताउनुभयाे ।
सरकारी, सामुदायिक तथा संस्थागत शिक्षालयका प्राध्यापक शिक्षक तथा कर्मचारीले राजनीतिक दलकाे सदस्य हुन नपाउने कानुनी व्यवस्था पूर्ण रुपमा कार्यान्वयन गरिने राष्ट्रपति पाैडेलले बताउनुभयाे ।
१ पालिका १ स्मार्ट विद्यालय अवधारणा कार्यान्वयनमा ल्याइने उहाँले बताउनुभयाे । नेपालमा शिक्षा हासिल गर्न आउने विद्यार्थीलाई भिसा सहजीकरण गरिने राष्ट्रपति पाैडेलले बताउनुभयाे ।
