काठमाडाैं । उपप्रधान तथा गृहमन्त्री रवि लामिछानेकाे सरकारकाे नीति तथा कार्यक्रममा धेरै कुरा विषय आएका बताउनुभएकाे छ ।
बिहीबार संघीय संसद् भवन नयाँ बानेश्वरमा सञ्चारकर्मीसँग कुरा गर्दै गृहमन्त्री लामिछानेले नीति तथा कार्यक्रममा धेरै विषय नयाँ आएका बताउनुभयाे । शिक्षा, श्रम, कानुन, गृह लगायत मन्त्रालयमा धेरै कुरा नयाँ आएका उहाँले बताउनुभयाे ।
रास्वपाका सभापति समेत रहनुभएका गृहमन्त्री लामिछानेले नयाँ कुराहरु कार्यान्वयनमा जानुपर्ने बताउनुभयाे । गृहकै कुरा गर्दा खुला काराकार सञ्चालन गर्ने, सबै तहका प्रहरी कर्मचारीको सेवानिवृत्त हुने अवधि पुनरावलोकन र बढुवा प्रणाली अनुमानयोग्य बनाउने, गाँजाको औषधीजन्य प्रयोग, नियन्त्रित उत्पादन र व्यवसायीकरणलाई प्रोत्साहन गर्न नीतिगत र कानुनी प्रबन्ध गर्ने लगायत कार्यक्रम आएका उहाँले बताउनुभयाे ।
राष्ट्रका लागि आवश्यक सुरक्षा तथा प्रतिरक्षा सामग्री, अत्यावश्यक गोलीगट्टा, विस्फोटक पदार्थ, लत्ताकपडा लगायत अन्य सैन्य सामग्री उत्पादनमा आत्मनिर्भरता हासिल गर्ने कार्यक्रम पनि सरकारले ल्याएकाे छ ।
संसद्काे रमिता कहिले हट्छ भन्ने सञ्चारकर्मीकाे प्रश्नमा गृहमन्त्री लामिछानेले भन्नुभयाे - 'कांग्रेसलाई साेध्नुस् ।'
रास्वपाका उपसभापति एवं सांसद् डा.स्वर्णिम वाग्लेले नीति तथा कार्यक्रमले बजेटसँग तादात्म्यता मिल्ने र कार्यान्वयनमा जाने गरी क्रमिक सुधार गर्ने बताउनुभयाे । पहिला-पहिला ठूला गर्ने, पहिले कर्मकाण्डी हुने, बजेटसँग तादात्म्यता नमिल्ने र कार्यान्वयनमा नजाने गरेकाेमा अहिले कुरा साना तर कार्यान्वयन हुनेगरी नीति तथा कार्यक्रम आएकाे उहाँले बताउनुभयाे ।
