काठमाडाैं । नेकपा एमालेका सांसद् रघुजी पन्तले नेपाली कांग्रेसले प्रतिनिधि सभामा आज असंसदीय व्यवहार गरेकाे बताउनुभएकाे छ ।
बिहीबार संघीय संसद् भवन परिसरमा सञ्चारकर्मीसँग कुरा गर्दै सांसद् पन्तले एमाले संसदीय दलका नेता केपी शर्मा ओलीमाथि भाैतिक आक्रमणकाे प्रयास गरेर कांग्रेसले असंसदीय चरित्र प्रदर्शन गरेकाे बताउनुभयाे । 'याे असंदीय घटना हाे, सत्तापक्षकाे एउटा ठूलाे पार्टीका नेताले बाेल्न पाउनुपर्छ भन्दा मन्त्री भइसकेका प्रतिपक्षका सांसदहरु झम्टिएर जाने हो ? उहाँहरुले नारा लगाइरहेको बेलामा हामीले त आपत्ति जनाएनौ, हामी आफ्नो ठाउँमा छौं, ओलीजीले आफ्नो ठाउँमा उभिएर बोल्न पाउनुपर्छ भन्दा आक्रमण गर्न जाने हो ? आक्रमण गर्न जाने हाे ?' - उहाँले भन्नुभयाे ।
कांग्रेसका सांसद्हरु हातपात गर्न आएपछि आफूहरु आफ्नाे अध्यक्षलाई जाेगाउन गएकाे सांसद् पन्तले प्रष्ट पार्नुभयाे । 'हातपात गर्न आएपछि आफ्नो अध्यक्षलाई जोगाउन जाँदैनन् ? याे त सबैकाे दायित्व हाे, आज उहाँहरुले दुर्व्यवहार गर्न खोज्नुभयो, भाैतिक आक्रमण गर्न खाेज्नुभयाे म हाम्राे दलकाे तर्फबाट आपत्ति गर्छु, याे अराजनीकि घटना हो'- उहाँले भन्नुभयाे ।
लाेकतन्त्रमा कुनै पनि सांसद्ले आफूमाथि प्रश्न उठेपछि जवाफ दिन पाउने सांसद् पन्तले बताउनुभयाे । गृहमन्त्री लगातार आराेप लगाइरहेकाे कांग्रेसले गृहमन्त्रीलाई एक पल्ट बाेल्न पनि नदिएकाे उहाँले बताउनुभयाे । आफूमाथि लागेकाे आराेपकाे जवाफ दिन पाउने रविकाे अधिकार भएकाे सांसद् पन्तले बताउनुभयाे ।
अहिलेसम्मकाे नजिर हेर्दा घटना विशेषमा संसदीय छानबिन समिति बनेकाे तर व्यक्ति विशेषमाथि छानबिन समिति नबनेकाे उहाँले बताउनुभयाे ।
