काठमाडाैं । नेकपा माओवादी केन्द्रका सांसद् माधव सापकोटाले बिहीबारको प्रतिनिधि सभा बैठकमा प्रमुख प्रतिपक्षी नेपाली कांग्रेसले असंसदीय व्यवहार गरेकाे भन्दै माफी माग्नुपर्ने बताउनुभएकाे छ ।
संघीय संसद् भवन परिसरमा सञ्चारकर्मीसँग कुरा गर्दै सांसद् सापकाेटाले कांग्रेसले सदनमा असंसदीय कार्यशैली प्रदर्शन गरेकाले माफी माग्नुपर्ने बताउनुभयाे । 'कांग्रेसका उपसभापति उपसभामुखलाई उठाएर उहाँकाे आशनमा गएर उभिनुभयाे, त्याे बिल्कुलै असंसदीय कार्यशैली र व्यवहार हाे, कांग्रेसजस्ताे संसदीय अभ्यासमा पाेक्त र विश्वास राख्ने पार्टीले आफ्नाे आशन र मर्यादालाई समेत भुल्नु राम्राे भएन, असंदीय गतिविधि र क्रियाकलाप भएकाेमा कांग्रेसले क्षमा माग्नुपर्छ'- उहाँले भन्नुभयाे ।
कांग्रेसले संसद् स्थगित भएपछि सभामुख देवराज घिमिरे र प्रधानमन्त्री पुष्पकमल दाहाल प्रचण्ड र संसदभित्र नेकपा एमालेका अध्यक्ष केपी शर्मा ओलीमाथि दुर्व्यवहार गर्ने काम कांग्रेसबाट भएकाे सांसद् सापकाेटाले बताउनुभयाे ।
सदनकाे गतिराेध अन्त्यका लागि प्रधानमन्त्री प्रचण्डले अथक मेहनत र प्रयास गर्नुभएकाे उहाँले बताउनुभयाे । साेहीअनुसार प्रमुख प्रतिपक्षले उपप्रधान तथा गृहमन्त्री रवि लामिछानेलाई बाेल्न दिने र सत्तापक्षले संसदीय समिति गठन गर्ने करिब सहमति भएकाे सांसद् सापकाेटाले बताउनुभयाे । तर बिहानकाे छलफलकाे स्प्रिडबाट कांग्रेस पछि हटेपछि सदन अगाडि बढाउने काम भएकाे उहाँले बताउनुभयाे ।
संसदभित्र कांग्रेसका सिनियर नेताहरुबाटै एमाले अध्यक्षमाथि असंसदीय व्यवहार भएकाले कांग्रेसले क्षमा माग्नुपर्ने सांसद् सापकाेटाले बताउनुभयाे । 'जे घटना भयाे संसदभित्र आज मलाई त सांसद् भन्न पनि लज्जाबाेध भएकाे छ, कांग्रेसका सिनियर नेताबाट जे क्रियाकलाप र गतिविधिहरु भए यसकाप्रति क्षमा मागेर आइन्दा संसद्लाई गरिमामय बनाउँछाैं भनेर एउटा कमिटमेन्ट गर्नुपर्छ, नेपाली जनतालाई निराश बनाउनुहुँदैन'- उहाँले भन्नुभयाे ।
बैठक स्थगनपछि सभामुखको बाटो छेकेर कांग्रेसले सभामुखमाथि पनि दुर्व्यवहार गरेकाे सांसद् सापकाेटाले बताउनुभयाे । प्रधानमन्त्री प्रचण्डले तपाइँहरु जिम्मेवार हुनुस् भन्दा प्रधानमन्त्रीमाथि पनि कांग्रेसले दुर्व्यवहार गरेकाे उहाँले बताउनुभयाे ।
संसद्काे महत्वपूर्ण समय बर्बाद भइरहेकाे भन्दै सांसद् सापकाेटाले यसप्रति प्रमुख प्रतिपक्ष गम्भीर बन्नुपर्ने सांसद् सापकाेटाकाे सुझाव छ ।
