काठमाडाैं । उपप्रधान तथा गृहमन्त्री एवं रास्वपाका सभापति रवि लामिछानेले नेपाली कांग्रेसले आफूलाई डेढ वर्षका लागि अफर गरेको बताउनुभएकाे छ ।
आइतबार बसेकाे प्रतिनिधि सभा बैठकलाई सम्बोधन गर्दै गृहमन्त्री लामिछानेले अफर नमानेपछि कांग्रेसले आफूमाथि प्रहार गरेर संसद् अवराेध सुरु गरेकाे बताउनुभयाे ।
गृहमन्त्री हुन नमिल्ने तर प्रधानमन्त्री हुन कुन नैतिकताले मिल्ने हो भन्दै उहाँले कांग्रेसलाई प्रश्न गर्नुभयाे । 'म गृहमन्त्री हुन नमिल्ने भए प्रधानमन्त्री बन्न चाहिँ कुन नैतिकताले मिल्ने रहेछ म आज यो सदनमा सोध्न चाहन्छु ? अफर गर्नेले कान रातो पार्नुपर्दैन म राजनीतिमा गोपनीयता ख्याल राख्ने मान्छे हूँ केही गोपनीयता राखौंला, मेराे प्रश्न छ हिजो मलाई डेढ महिना प्रधानमन्त्री हुन गरेको अफरको डेट अफर छ कि अझै बाँकी छ ? यो कुराको जवाफ सदनमा उभिएर कांग्रेस सभापतिले दिनुभयाे भने मेरा लागि कल्याण हुनेछ' - गृहमन्त्रीकाे प्रश्न छ ।
राति प्रधानमन्त्रीको अफर अनि अफर अस्वीकार गरेपछि भोलिपल्ट संसद् अवरोध गर्ने काम कांग्रेसले सुरु गरेकाे उहाँले बताउनुभयाे । 'उहाँले असाध्यै मान्नुहुने घटालनाथमा मैले पनि पाइला राख्ने अवसर पाएकाे छु, त्यसैलाई सम्झिएर भने हुन्छ मेरा लागि त्याे अफर आएकाे थियाे कि थिएन ? राति प्रधानमन्त्रीको अफर अनि अफर अस्वीकार गरेपछि सदन अवरुद्ध र संसदीय समितिको माग ? यो राजनीतिको कुन नैतिकताको पृष्ठमा पर्छ ? यसकाे जवाफ माग्न चाहान्छु'- गृहमन्त्री लामिछानेले भन्नुभयाे ।
आफूले निवेदन दिएर ऋण लिएकाे प्रमाण मसँग रहेकाे कांग्रेस महामन्त्री गगन थापाले बताएकाे भन्दै उहाँले प्रमाण देखाउन चुनाैती दिनुभयाे ।
