काठमाडौं । प्रतिनिधि सभा सदस्य विष्णु पौडेलले नयाँ सत्ता समीकरण बनेपछि बरालिएको विकासले नयाँ गति लिएको बताउनुभएको छ ।
सोमबार प्रतिनिधि सभा बैठकमा प्रधानमन्त्रीको विश्वासको मतको प्रस्ताव माथिको छलफलमा भाग लिँदै पौडेलले विगतमा एमालेले सुरु गरेको विकास रोकिएकोमा नयाँ समीकरण बनेसँगै विकास सही बाटोमा अधि बढेको बताउनुभयो । प्रचण्ड नेतृत्वको अहिलेको सत्ता समीकरणमा मुलुकको बेथिति रोक्न सक्छ भन्ने सन्देश दिन सकिएको पौडेलले स्पष्ट पार्नुभयो ।
देशको बिग्रिएको अर्थतन्त्र र बेथितिले नागरिकमा बढेको निराश रोक्न नयाँ समीकरणले काम गरेको उहाँले बताउनुभयो । सरकारका पछिल्ला प्रयासले नागरिकमा क्रमशः आशाको सञ्चार भएको उहाँले स्पष्ट पार्नुभयो ।
यस्तो अवस्थामा स्थायित्वको आवश्यकता रहेको उहाँले स्पष्ट पार्नुभयो । तर पर्दा भित्रबाट सरकारलाई कमजोर पार्ने र सरकार बदल्ने कोसिस भए । ‘सरकार परिवर्तनको लागि गरिएको कोसिस माकुराको जालो जस्तै गरी च्यातिए’, पौडेलले भन्नुभयो ।
उहाँले राजनीतिक स्थायित्वको लागि यो सरकारलाई सबैले विश्वासको मत दिन आवश्यक रहेको बताउनुभयो । प्रधानमन्त्री पुष्पकमल दाहाल प्रचण्ड नेतृत्वको सरकारले पूरा कार्यकाल चल्ने पनि उहाँले दाबी गर्नुभयो ।
