काठमाडौं । प्रतिनिधि सभामा प्रतिपक्षी दल नेपाली कांग्रेसको नाराबाजी र अवरोधका बिच राष्ट्रपतिलाई दिने धन्यवाद प्रस्ताव पारित भएको छ ।
मंगलबार कांग्रेसको नाराबाजीको बिचमा प्रधानमन्त्री पुष्पकमल दाहाल प्रचण्डले मर्यादा पालकको सुरक्षा घेराबाट रोष्टममा गएर प्रतिनिधि सभामा सरकारको नीति तथा कार्यक्रम प्रस्तुत गरेकामा राष्ट्रपतिलाई दिने धन्यवाद प्रस्ताव प्रस्तुत गर्नुभएको थियो ।
प्रस्तावलाई सभामुख देवराज घिमिरेले निर्णयार्थ प्रतिनिधि सभा बैठकमा प्रस्तुत गर्नुभएकोमा कांग्रेस सांसदहरूको होहल्लाकै बिच सत्ता पक्षका सांसदले ध्वनि मतिले समर्थन जनाउनुभएको थियो । सभामुखले प्रस्ताव निर्णयार्थ प्रस्तुत गर्दा नेमकिपाका संसद् प्रेम सुवालले हुन्न भन्ने पक्षमा हात उठाउनुभएको भए पनि हुन्न भन्ने आवाज नसुनिएकोले प्रस्ताव पास भएको सभामुखले घोषणा गर्नुभयो ।
गत जेठ १ गते राष्ट्रपति रामचन्द्र पौडेलले संघीय संसद्को संयुक्त बैठकमा सरकारको नीति तथा कार्यक्रम प्रस्तुत गर्नुभएको थियो । नीति तथा कार्यक्रम प्रस्तुत गर्नुभएकोमा राष्ट्रपतिलाई धन्यवाद दिन प्रधानमन्त्रीले प्रस्ताव प्रस्तुत गर्नुभएको थियो ।
प्रमुख प्रतिपक्षी दल नेपाली कांग्रेसले उपप्रधान तथा गृह मन्त्री रवि लामिछाने सहकारी ठगी प्रकरणमा मुछिएको भन्दै छानबिन गर्न संसदीय समितिको माग गर्दै संसद् अवरुद्ध गर्दै आएको छ ।
