काठमाडाैं । सरकारले विद्युतीय गाडीको भन्सार दर र अन्तःशुल्क बढाएको छ ।
संसद्का दुवै सदनकाे संयुक्त बैठकमा आगामी आर्थिक वर्ष ०८१-०८२ को बजेट प्रस्तुत गर्दै अर्थमन्त्री वर्षमान पुनले विद्युतीय गाडीमा ५ देखि २० प्रतिशतसम्म भन्सार दर र अन्तःशुल्क बढेको बताउनुभयाे ।
५० किलोवाटसम्मको विद्युतीय गाडीमा ५ प्रतिशत भन्सार दर बढाएर १५ प्रतिशत बनाइएकाे छ भने ५ प्रतिशत अन्तःशुल्क लाग्नेछ ।
अब ५१ देखि १ सय किलोवाटसम्मको विद्युतीय गाडीमा २० प्रतिशत भन्सार र १५ प्रतिशत अन्तःशुल्क लाग्नेछ । १ सयदेखि २ सय किलोवाटसम्म मोटर क्षमता भएका गाडीमा ३० प्रतिशत भन्सार लाग्नेछ भने २० प्रतिशत अन्तःशुल्क लाग्नेछ ।
२ सयदेखि ३ सय किलोवाट मोटर क्षमताका गाडीमा ६० प्रतिशत भन्सार र ३५ प्रतिशत अन्तःशुल्क लाग्नेछ ।
३ सयभन्दा बढी मोटर क्षमता भएका विद्युतीय गाडीमा ८० प्रतिशत भन्सार र ५० प्रतिशत अन्तःशुल्क कर लाग्नेछ ।
अर्थमन्त्री पुनले मदिरा, वियर, सुर्ती र चुराेटमा लगाइएकाे अन्तशुल्क वृद्धि गरिएकाे पनि बताउनुभयाे । जसअनुसार बियरमा हाल १ लिटर बराबर २३५ रूपैयाँ अन्त:शुल्क लाग्दै आएकोमा अब २४० रुपैयाँ लाग्नेछ ।
बियर बाहेककाे अल्काेहलमा हाल ४ सय ४४ रूपैयाँ अन्त:शुल्क लाग्दै आएकाेमा ४ सय ६० पुर्याइएकाे छ । चुराेटकाे अन्त:शुल्क ४ प्रतिशत बढाइएकाे छ ।
