काठमाडौं । प्रतिनिधि सभा सदस्य ईश्वरीदेवी न्यौपानेले संघीय सांसदहरूले संसद् बैठकमा जथाभाबी ड्रेस लगाएको आएको प्रति आपत्ति जनाउनुभएको छ ।
आइतबार प्रतिनिधि सभा बैठकमा बोल्दै न्यौपानेले सांसदहरू जस्तो ड्रेसमा पनि आउन पाउने तर सर्वसाधारणलाई जुत्ता र पाइन्ट नलगाएको भनि संसद् भवन र सिंह दरबारमा प्रवेश गर्न रोक लगाउने गरिएको उहाँले बताउनुभयो । ‘यो संसदमा मर्यादित ड्रेस लगाएर आउने हामी कति जना छौँ ?’, उहाँले प्रश्न गर्नुभयो ।
आज संसदमा कोही फ्रक लगाएर, कोही टी सर्ट र पाइन्ट लगाएर, कोही जम्पर लगाएर, कोही गरारा, कोही सरारा लगाएर आउने गरेका उहाँले बताउनुभयो । ‘हामीलाई चाहिँ सबै छुट, अनि जनतालाई चाहिँ त्यसमा बन्देज ?’, उहाँले प्रश्न गर्नुभयो ।
नियम बनाउनेले चाहिँ जस्तो लगाए पनि हुने, नौरङ्गी ड्रेस लगाए पनि हुने तर सर्वसाधारणले चप्पल र हाफ पाइन्ट लगाएर किन आउन नपाउने ? भन्दै उहाँले प्रश्न गर्नुभयो ।
नेपालका सांसद् र मन्त्रीले कस्तो ड्रेस लगाउने भन्दै उहाँले अन्य देशको पनि उदाहरण हेर्न आग्रह गर्नुभयो । बाहिर व्यक्तिगत रूपमा जस्तो लगाए पनि संसद् भवन भित्र पस्दा कस्तो ड्रेस लगाउनु पर्छ भन्ने कुरा सभामुख मार्फत रुलिङ गर्न उहाँले माग गर्नुभयो । साथै चप्पल लगाउने नागरिकलाई प्रवेश नदिएको सम्बन्धमा सरकारले जवाफ दिनुपर्ने उहाँले बताउनुभयो ।
