काठमाडौं । प्रतिनिधि सभा सदस्य गगनकुमार थापाले सहकारी अपचलनमा छानबिन आयोग बनाउन कांग्रेसले उठाएको माग जायज भएको बताउनुभएको छ ।
आइतबार प्रतिनिधि सभा बैठकको विशेष समयमा बोल्दै थापाले सो प्रकरणमा गृह मन्त्रीको समेत संलग्नता देखिएकोले कांग्रेसले छानबिन समिति गठन गर्न माग गरेको स्मरण गराउनुभयो । कांग्रेसको माग जायज भएकै कारण माग सम्बोधन भएको उहाँले दाबी गर्नुभयो । त्यो माग त्यति बेला नै सम्बोधन भएको भए संसद् बैठक यति लामो समयसम्म अवरुद्ध नहुने उहाँले सुनाउनुभयो । ‘जायज माग सम्बोधन भएको भए संसदमा कतिपय अप्रिय दृश्य पनि देख्नु पर्दैन थ्यो’, थापाले भन्नुभयो ।
सत्ता पक्षको पेलाहा सोचको कारण संसदीय छानबिन समिति बन्न ढिला भएको थापाले बताउनुभयो । छानबिन समितिले चारवटा विषयमा काम गर्ने थापाले स्पष्ट पार्नुभयो । नाम नलेखेको भए पनि संसदीय छानबिन समितिले गृह मन्त्री रवि लामिछाने माथि छानबिन गर्ने, बयान लिने र कानुनी कारबाहीको सिफारिस गर्ने उहाँले बताउनुभयो ।
सदनलाई ढाँट्ने सबैलाई छानबिन समितिले नछाड्ने उहाँले बताउनुभयो । सहकारी ठगी प्रकरणमा जतिसुकै शक्तिशाली मानिस भए पनि उम्कन नपाउने थापाको भनाइ छ ।
संसद् बाहिर राष्ट्रिय स्वतन्त्र पार्टीका सांसदहरूले सहकारी ठगी प्रकरणमा असंसदीय र अमर्यादित गतिविधि देखाएको भन्दै उहाँले आलोचना गर्नुभयो । संसद् भित्रै पनि गृह मन्त्रीले असंसदीय र अमर्यादित शब्द प्रयोग गरेको उहाँको भनाइ छ । नयाँ अवतारमा आउँदैमा पुरानो स्वभाव नजाने थापाले बताउनुभयो ।
गृह मन्त्रीले यो संसदमा सूचना बेच्ने मानिस पनि छ भनेर संसद् बैठकमा बोलेको प्रमाण पुर्याउन उहाँले चुनौती दिनुभयो । गृह मन्त्री बरालिएको बताउँदै उहाँले अब हिसाब किताब प्रधानमन्त्रीसँग हुने उहाँले चेतावनी दिनुभयो । 'हिसाबकिताब त लिइन्छ लिइन्छ, यही संसद् भित्रै लिइन्छ, सभामुखज्यूकै अगाडि लिइन्छ', थापाले भन्नुभयो ।
सदनको गरिमालाई ख्याल गर्न उहाँले सभामुखलाई पनि आग्रह गर्नुभयो । सदन चटकले जस्तो चटक देखाउने ठाउँ नभएको उहाँले बताउनुभयो ।
