काठमाडाैं । राष्ट्रिय स्वतन्त्र पार्टी (रास्वपा) का सांसद् गणेश पराजुलीले सरकारले ल्याएको बजेटले आम नागरिककाे भान्साको मूल्य केही हदसम्म भए पनि कम गर्ने बताउनुभएकाे छ ।
आइतबार बसेकाे प्रतिनिधि सभा बैठकमा आगामी आर्थिक वर्ष ०८१-०८२ को राजस्व र व्ययको वार्षिक अनुमानमाथिको छलफलमा भाग लिँदै सांसद् पराजुलीले आलु र प्याजमा लगाइएकाे कर खारेज गर्दा नागरिकमा खुशी छाएकाे बताउनुभयाे । 'आम नागरिककाे भान्सामा बढेकाे मूल्यलाई केही हदसम्म कम गर्न यसले मद्दत गर्छ, आलु र प्याजमा लगाइएको भ्याट घटाउँदै गर्दा आम नेपाली जनताकाे मुहारमा खुशी देखिएकाे छ, म अर्थमन्त्रीलाई धन्यवाद दिन्छु ।' सांसद् पराजुलीले सूचना प्रविधिलाई उद्योगका रुपमा पहिचान गरी उद्योग स्थापना गर्न गरेको प्रोत्साहन र प्रयासले सूचना प्रविधि उद्याेगमा कायापलट हुने आशा जगाएकाे बताउनुभयाे । तयारी पोशाकको पैठारी दरभन्दा कच्चापदार्थको पैठारी भन्सार दर एक तह कम गर्ने नीतिगत निर्णयले स्वदेशी उद्योग प्रवर्द्धन गर्न सार्थकता पाउने उहाँले बताउनुभयाे ।
सार्वजनिक संस्थानलाई सम्भाव्यता अध्ययनका आधारमा पब्लिक लिमिटेड वा निजी क्षेत्रसँग साझेदारिमा ल्याइने तथा सरकारी नीतिले रुग्ण र धराशायी उद्योगले पुर्नजीवन पाउने, उत्पादन र रोजगारी बढाउने सम्भावनाले युवा पुस्तामा आशाको सञ्चार गराएकाे सांसद् पराजुलीले बताउनुभयाे ।
उद्यमीसँगको सहकार्यमा कक्षा १२ उत्तीर्ण विद्यार्थीलाई व्यावसायिक सीप र रोजगारीसँग जाेड्ने नीति तथा वैदेशिक रोजगारीबाट फर्केकालाई ज्ञान, सीप र पुँजीमार्फत उद्यमशिलता र श्रमबजारसँग जोड्ने रिटर्नी उद्यमशीलता कार्यक्रमले सार्थकता पाउने कुराले जनतामा उत्साह छाएकाे उहाँले बतायनुभयाे ।
