काठमाडाैं । सत्तासाझेदार राष्ट्रिय स्वतन्त्र पार्टी (रास्वपा) सांसद् हरि ढकालले सरकारले ल्याएकाे बजेट यथास्थितिकै निरन्तरता रहेकाे बताउनुभएकाे छ ।
साेमबार बसेकाे प्रतिनिधि सभा बैठकमा आगामी आर्थिक वर्ष २०८१-०८२ को राजस्व र व्ययको वार्षिक अनुमान (बजेट) माथिको छलफलमा भाग लिँदै सांसद् ढकालले बजेट तयार पार्दा गठबन्धन दलसँग छलफल नगरिएकाे र दिइएका सुझाव पनि नसमेटिएकाे बताउनुभयाे ।
आफूले सेयर बजारबारे १० बुँदे सुझाव दिएपनि एउटा बुँदा समेत नसमेटिएकाे भन्दै उहाँले असन्तुष्टि जनाउनुभयाे ।
कृषिमा लगानी दशक घाेषणा गरिएपनि बजेट कम विनियाेजन गर्नु गलत भएकाे सांसद् ढकालले बताउनुभयाे । भैरहवा र पाेखरा अन्तर्राष्ट्रिय विमानस्थल सञ्चालनकाे कुनै याेजना बजेटमा नसमेटिएकाेमा पनि उहाँले आपत्ति जनाउनुभयाे ।
साढे ५ खर्ब ऋण लिने कुरा एकदम डरलाग्दाे भएकाे समेत सांसद् ढकालले बताउनुभयाे । असुल गर्नुपर्ने बेरुजु साढे ४ खर्ब रहेकाे भन्दै उहाँले बेरुजु असुल उपर गर्ने कुरा नसमेटिएकाे बताउनुभयाे ।
निजी क्षेत्रलाई कुनै उल्लासकाे बजेट नभएकाे, युवा पलायन राेक्ने कुनै ठाेस कार्यक्रम बजेटमा नभएकाे सांसद् ढकालले बताउनुभयाे । रासायनिक मल खरिदका लागि कम बजेट विनियाेजन गरिएकाे भन्दै उहाँले मलकाे हाहाकार हुने बताउनुभयाे ।
बजेट संशाेधन गर्नका लागि अर्थमन्त्री वर्षमान पुनलाई इतिहासले एउटा स्वर्णिम अवसर रहेकाे सांसद् ढकालले बताउनुभयाे । उहाँले प्रश्न गर्नुभयाे - 'इतिहासले ३४ वर्षमा दिएकाे अवसर सदुपयाेग गर्न सक्नुहुन्छ ? त्यही आन्तरिक ऋण उठाउने कुरामा संशाेधन गराैं न, असुल उपर गर्नुपर्ने बेरुजु साढे ४ अर्ब छ, त्यहाँ ५० अर्ब उठाउने भनेर बुँदा थपाैं र ५० अर्ब आन्तरिक ऋण उठाऔं न ।'
