काठमाडौं । प्रतिनिधि सभा सदस्य राजेन्द्र राजेन्द्र लिङ्देनले अर्थमन्त्रीले धेरै विवादास्पद काम नगरी बजेट ल्याउनुभएको बताउनुभएको छ ।
मंगलबार प्रतिनिधि सभा बैठकमा बजेट माथिको छलफलमा भाग लिँदै लिङ्देनले बजेटलाई अर्थ मन्त्रीले गिजोल्ने काम नगरको भन्दै धन्यवाद दिनुभयो । ‘यसरी सङ्कलन गर्ने, यसरी बाँड्ने, सकेसम्म सबैको चित्त बुझाउने, आफ्नो कार्यकर्ताको लागि पनि अलिकति ठाउँ राख्ने, यो मिलाउनुभएको छ’, उहाँले भन्नुभयो ।
बजेट परम्पराकै निरन्तरता भएको लिङ्देनले टिप्पणी गर्नुभयो । बजेटमा धेरै टिप्पणी गर्नुपर्ने कुरा नभएको उहाँले सुनाउनुभयो ।
तथापि नेपालको अर्थतन्त्रको अहिलेको अवस्थालाई सम्बोधन गर्ने गरी बजेट नआएको उहाँले बताउनुभयो । बजेटले छलाङ मार्ने र हामी सुध्रियौँ, देश सुधार तर्फ गयो भन्ने आशा जगाउन नसकेको लिङ्देनको धारणा छ ।
हरेक वर्ष घाटा बजेट ल्याएर देश अघि बढ्न नसक्ने उहाँले स्पष्ट पार्नुभयो । ‘सधैँ अनुमान, अनुदान र ऋण, यी तीनवटा चिजलाई समातेर हामीले बजेट बनाइरहेका छौँ र असफल भइरहेका छौँ’, उहाँले भन्नुभयो ।
उहाँले पुँजीगत र चालु खर्चको दुरी घटाउन नसकेको, विद्युत् उपयोगको लागि विद्युतीय गाडी आयातमा प्रोत्साहन गर्नुपर्नेमा निरुत्साहित गरिएको, रोजगारी सिर्जना कार्यक्रम नआएका, रुग्ण उद्योग सञ्चालनमा ल्याउने कुनै योजना नभएका, द्वन्द्व, लाेडसेडिङ लगातका कारण बन्द भएका निजी क्षेत्रका उद्योगलाई प्रोत्साहन गर्ने कुनै कार्यक्रम नल्याएको भन्दै बजेटको आलोचना गर्नुभयो ।
