काठमाडाैं । नेकपा एमालेका सांसद् मानवीर राईले साेलुखुम्बुकाेलुक्ला विमानस्थललाई उच्च प्राथमिकतासाथ स्तरोन्नति गर्न सरकारकाे ध्यानाकर्षण गराउनुभएकाे छ ।
बिहीबार बसेकाे प्रतिनिधि सभाको बैठककाे विशेष समयमा बोल्दै सांसद् राईले सगरमाथाको पहुँचमार्गका रुपमा साे विमानस्थलकाे उच्च प्राथमिकतासाथ स्तरोन्नति गर्न सरकारसँग माग गर्नुभयाे । पर्यटन विकासको मुख्य आधार नै सगरमाथा क्षेत्र रहेको भन्दै उहाँले त्यस क्षेत्रको विकासका लागि काम गर्न सरकारकाे ध्यानाकर्षण गराउनुभयाे ।
सगरमाथा घुम्न जाने पर्यटकहरुले साेही विमानस्थल प्रयोग गर्ने भन्दै सांसद् राईले एकपटक आएका पर्यटक विमानस्थल सानाे हुँदा पुनः विमानस्थलमा आउन गाह्राे मान्ने स्थिति रहेकाे बताउनुभयाे । 'संसारका मानिसहरु, संसारका पर्यटकहरू सगरमाथा घुम्न आउँछन्, तर एकमात्र हवाई यात्रा लुक्ला एयरपोर्ट छ, त्याे सानो एयरपोर्ट छ, फेरि-फेरि दुःख कष्ट खेपेर त्यो क्षेत्रमा पर्यटक आउन बडो गाह्रो मान्ने परिस्थिति छ, पर्यटन विकास हाम्रो मुलुकको आधार हो भने विगत लामाे समयदेखि मैले याे विषयलाई उठाउँदै आएकाे छु, गत सालको बजेटले त्यसलाई समेट्न सकेन, अहिले मन्त्रीज्युले प्राथमिकतामा राखेको छु भन्नुभएको छ, प्राथमिकतामा राखेर होइन उच्च प्राथमिकतामा राखेर सगरमाथाको पहुँचमार्ग भनेर उल्लेख गर्नु जरुरी छ ।'
सरकारले कृषि, पर्यटन र जलविद्युतको क्षेत्रलाई पनि उच्च प्राथमिकता दिनुपर्ने भन्दै उहाँले कृषिमा छुट्याइएकाे बजेट कम भएकाे बताउनुभयाे । घाेषणा गरिएका कार्यक्रम कार्यान्वयन गर्न सांसद् राईले सरकारकाे ध्यानाकर्षण गराउनुभयाे ।
दूधकोशी नदीबाट ५ हजार मेगावाट बढी विद्युत उत्पादन हुने भन्दै उहाँले थप विद्युत उत्पादन गर्न पनि सरकारको ध्यानाकर्षण गराउनुभयाे ।
साेलुखुम्बुमा रहेकाे नेपालकै विश्वविद्यालय स्तरकै नेपा पर्वतीय प्रशिक्षण प्रतिष्ठानलाई गत वर्ष हाेटलकाे संस्थासँग गाभिएकाे भन्दै सांसद् राईले विश्वविद्यालय जस्ताे महत्वपूर्ण विषयलाई हाेटलसँग गाभ्ने काम बेठिक भएकाले तत्काल अलग बनाउनुपर्ने बताउनुभयाे । साे प्रतिष्ठानलाई ३१ सय राेपनी जग्गा लिएर सरकारले तत्काल सञ्चालन गर्नुपर्ने उहाँले बताउनुभयाे ।
महाकुलुङ गाउँपालिकाकाे ४ र ५ नम्बर वडाका शिक्षक र कर्मचारीले दुर्गम भत्ता नपाएकाे भन्दै सांसद् राईले तत्काल साे भत्ता दिलाउन सरकारकाे ध्यानाकर्षण गराउनुभयाे ।
महाकुलुङकाे वडा नम्बर ५ मा सुरुङ खन्ने काम भइरहेकाे भन्दै उहाँले त्यही वडाका प्रभावित जनतालाई हटाउने काम भइरहेकाे बताउनुभयाे । त्यसतर्फ पनि सांसद् राईले सरकारकाे ध्यानाकर्षण गराउनुभयाे ।
साेलुखुम्बु हुँदै भाेजपुर-तराई विराटनगर जाेड्ने उत्तर दक्षिण सडकलाई उच्च प्राथमिकतामा राखी कार्यान्वयनकाे चरणमा लैजान सरकारकाे ध्यानाकर्षण गराउनुभयाे ।
