काठमाडाैं । सहकारी बचत रकम दुरुपयोग संसदीय छानबिन विशेष समितिले सहकारी छानबिनसँग सम्बन्धित विगतका प्रतिवदेनहरू झिकाउने निर्णय गरेकाे छ ।
शुक्रबार सिंहदरबारमा बसेको विशेष समितिको दोस्रो बैठकले सहकारी छानबिनका लागि विगतमा गठित ८ वटा समिति तथा जाँचबुझ आयोगहरुको प्रतिवेदन तत्काल उपलब्ध गराउन सम्बद्ध पक्षलाई आग्रह गर्ने निर्णय गरेको समिति संयाेजक सूर्य थापाले जानकारी दिनुभयाे ।
सहकारीका सन्दर्भमा बनेकाे याे नवाैं छानबिन समिति भएकाे भन्दै उहाँले यसअघि गठन भएका समिति तथा जाँचबुझ आयाेगका प्रतिवेदन झिकाउने निर्णय भएकाे उहाँले बताउनुभयाे । 'नेपालमा सहकारीलाई संस्थागत गर्ने सम्बन्धमा जतिपनि छानबिन, अध्ययन र जाँचबुझ समिति बनेका छन्, ती सबैका प्रतिवेदनहरु सचिवालयमार्फत पत्राचार गरेर प्राप्त गरिसक्ने निर्णय भएकाे छ, त्यसका लागि कार्यविधि चाहिएन, ती छानबिन प्रतिवेदनहरु सचिवालय अर्काे बैठकसम्म उपलब्ध गराउनेछ, सहकारीसँग सम्बन्धित त्यस्ता दस्तावेज र प्रतिवेदन उपलब्ध गराउनम समितिका तर्फबाट सम्बद्ध सबैसँग अनुराेध गर्न चाहान्छु'- संयाेजक थापाले भन्नुभयाे ।
समितिले कार्यादेश बनाउन गठित कार्यदलका सदस्यहरूसँग असार २ गते बस्ने बैठकमा सुझाव लिइने पनि उहाँले जानकारी दिनुभयाे । त्यसपछि कार्यविधि बनाइने संयाेजक थापाले बताउनुभयाे । ३ महिनाभित्र काम सक्नुपर्छ भन्नेमा समितिका सदस्यहरु एकमत रहेकाे पनि उहाँले बताउनुभयाे ।
