काठमाडौं । गण्डकी प्रदेशका मुख्यमन्त्री सुरेन्द्रराज पाण्डेले विश्वासको मत पाउनुभएको छ ।
सोमबार प्रदेश सभामा भएको मतदानमा मुख्यमन्त्री पाण्डेले ३१ मत पाउनुभएको छ । उहाँको पक्षमा नेपाली कांग्रेसका २७, राष्ट्रिय प्रजातन्त्र पार्टी राप्रपाका दुई, राजीव गुरुङ (दीपक मनाङे) र माओवादीको चुनाव चिह्न लिएर चुनाव जितेको नेपाल समाजवादी पार्टी (नेसपा) का प्रदेश सभा सदस्य फणीन्द्र देवकोटाले मतदान गर्नुभएको छ ।
प्रस्तावको विपक्षीमा नेकपा एमालेका २२ र माओवादीका ६ सांसद मत दिनुभएको छ । प्रदेश सभामा माओवादीको चुनाव चिन्ह लिएर चुनाव लड्नुभएका देवकोटाले माओवादीको ह्विप विपरीत फ्लोर क्रस गरेर मुख्यमन्त्रीलाई विश्वासको मत दिनुभएको छ ।
नेपाली काँग्रेस गण्डकीका संसदीय दलका नेता पाण्डे संविधानको धारा १६८ को उपधारा ३ अनुसार जेठ १६ गते मुख्यमन्त्री नियुक्त हुनुभएको थियो । सबैभन्दा ठुलो दलको नाताले उहाँ मुख्यमन्त्री बन्नुभएको थियो ।
देवकोटाले पार्टीको ह्विप विपरीत मुख्यमन्त्रीको पक्षमा मत दिएपछि गण्डकी प्रदेश सभामा प्रतिपक्षी दल नेकपा एमाले र माओवादी केन्द्रका सांसदहरूले नाराबाजी गरेका थिए । एमाले र माओवादी सांसदहरूले रोष्टममा अगाडि गएर ह्विप उल्लङ्घन गर्न पाइँदैन भन्दै नाराबाजी गरेका थिए ।
