काठमाडाैं । सामाजिक सुरक्षा भत्ताका लागि राष्ट्रिय परिचयपत्र नम्बर अनिवार्य गर्ने व्यवस्था तत्काल कार्यान्वयन नगर्न सांसद्हरुले सरकारसँग माग गरेका छन् ।
बिहीबार बसेकाे प्रतिनिधि सभा बैठकमा बाेल्दै सांसद्हरुले पूर्व तयारीबिना सामाजिक सुरक्षा भत्ताका लागि राष्ट्रिय परिचयपत्र नम्बर अनिवार्य गरिँदा ज्येष्ठ नागरिक, अशक्त र अपांगता भएका व्यक्तिहरुले दुःख पाएका बताए ।
प्रतिनिधि सभा बैठककाे शून्य समयमा बाेल्दै नेकपा एमालेकी सांसद् विद्या भण्डारीले पूर्वतयारी नगरिकन सामाजिक सुरक्षा भत्ताका लागि परिचयपत्र नम्बर अनिवार्य गरिँदा नागरिकले दु:ख पाएका बताउनुभयाे । राष्ट्रिय परिचयपत्र तथा पञ्जिकरण विभागले सामाजिक सुरक्षा भत्ता लिनका राष्ट्रिय परिचयपत्र नम्बर आवश्यक छ भनेर सूचना निकालेपछि देशभरका जिल्ला प्रशासन कार्यालयमा रहेकाे राष्ट्रिय पञ्जिकरण फिल्ड कार्यालयमा अनिवार्य उपपस्थित हुनुपर्ने प्रावधानसहित ज्येष्ठ नागरिक, अशक्त र अपांगता भएका व्यक्तिकाे भीड देखिएकाे उहाँले बाउनुभयाे ।सांसद् भट्टराईले सामाजिक सुरक्षा भत्ताका लागि राष्ट्रिय परिचयपत्र नम्बर अनिवार्य गर्ने व्यवस्था कार्यान्वयनका लागि ताेकिएकाे समय पर सार्न र आवेदन संकलनका लागि वडा स्तरमै घुम्ती शिविर सञ्चालन गर्न पनि गृहमन्त्रीकाे ध्यानाकर्षण गराउनुभयाे । 'दुर्गम गाउँदेखि घण्टौँ लगाएर अक्सिजन सिलिन्डरसमेत बोकेर जिल्ला प्रशासन कार्यालय आउनुपर्ने, पालो नपाएर फर्किनुपर्ने बाध्यता छ, यसकाे समाधानका लागि सामाजिक सुरक्षा भत्ता लिन राष्ट्रिय परिचयपत्र नम्बर अनिवार्य गर्ने सरकारको निर्णय कार्यान्वयन गर्न तोकिएको साउन महिनालाई केही पर सारौँ, आवेदन संकलनका लागि वडास्तरमा नै निश्चित समयमा नै घुम्ती शिविर सञ्चालन गर्न सकियाे भने यसलाई व्यवस्थित गर्न सकिन्छ भन्नेबारेमा गृहमन्त्रीज्यूलाई सभामुखमार्फत ध्यानाकर्षण गराउँदछु'- उहाँले भन्नुभयाे ।
प्रतिनिधि सभाकाे आकस्मिक समयमा बाेल्दै एमालेका सांसद् ऋषिकेश पोखरेलले सामाजिक सुरक्षा भत्ताका लागि पूर्वतयारीबिना राष्ट्रिय परिचयपत्र अनिवार्य गरिँदा देशभरका ज्येष्ठ नागरिक, अपांगता भएका व्यक्तिले दुःख पाएका बताउनुभयाे । सामाजिक सुरक्षा भत्ताका लागि राष्ट्रिय परिचय पत्र नम्बर र साउनमा बायाेमेट्रिक दुवै गर्नुपर्ने भनेपछि देशभरका जिल्ला प्रशासन कार्यालयमा अहिले भीड लागेकाे र सराेकारवाला नागरिकले दु:ख पाएकाे उहाँले बताउनुभयाे । सांसद् पाेखरेलले भन्नुभयाे - 'याे परिस्थितिले आज देशभरिका अपांगहरुकाे, ज्येष्ठ नागरिकहरुकाे, बिरामीहरुकाे के हात भएकाे छ ? सिंगाे समाज आज राजनीतिप्रति, संसद्प्रति, हामीप्रति के आशा गरिरहेकाे छ, गम्भीर बनाैं ।'राष्ट्रिय परिचयपत्रका लागि यी दुवै प्रावधान राख्ने कुरा राम्राे भएपनि पूर्वतयारी बिना काम गर्दा सामाजिक आतंक सृजना भएकाे बताउनुभयाे । 'याे राम्राे कुरा हाे, तर पूर्वतयारीबेगर आज जुन सामाजिक आतंक सृजना भएकाे छ, जुन ढंगले बिरामी, अपांग र ज्येष्ठ नागरिकले दु:ख पाइरहनुभएकाे छ, त्याे घटना हामी हेर्न सक्ने अवस्थामा छैनाैं, हरेक घरमा पुग्ने टाेली निर्माण गरेर, परिचयपत्रकाे व्यवस्थापन गरेर, बायाेमेट्रिक घरमै गराएर, यसकाे पूर्व तयारी गरेर अर्काे वर्ष लागू हुनेगरी याे वर्ष यसकाे सबै प्रक्रिया राेक्न आग्रह गर्छु'- उहाँले भन्नुभयाे ।
