काठमाडौं । प्रतिनिधि सभा सदस्य योगेश भट्टराईले बाढी पहिरो लगायतका विपत्तिका घटना सुरु भएकाले विपद् जोखिम व्यवस्थापनमा प्रभावकारी कम गर्न तथा उद्धार र राहतको लागि आवश्यक काम गर्न सरकारको ध्यानाकर्षण गराउनुभएको छ ।
शुक्रबार प्रतिनिधि सभा बैठकमा बोल्दै गए राति ताप्लेजुङमा गएको बाढी पहिरोको कारण गाउँपालिका उपाध्यक्षका पिता सहित चार जनाको ज्यान गएको घटना प्रति उहाँले दुःख व्यक्त गर्नुभयो । त्यस्तै अर्को एउटा घटनामा पहिरोको कारण दुई जना घाइते भएका जानकारी दिँदै भट्टराईले उहाँहरूको शीघ्र स्वास्थ्य लाभको कामना गर्नुभयो ।
भट्टराईले ताप्लेजुङ जिल्ला विगत केही वर्षदेखि प्राकृतिक विपत्तिको उच्च जोखिममा पर्दै आएको स्मरण गराउनुभयो । ‘विगत वर्षमा पनि त्यहाँ त्यस्तै प्राकृतिक विपत्ति आइलाग्यो, अहिले पनि त्यस्तै प्रकारको विपत्ति आइलागेको छ’, उहाँले भन्नुभयो ।
पहाडी र हिमाली जिल्ला प्राकृतिक विपत्तिको हिसाबले निक्कै जोखिमपूर्ण भएकाले ती क्षेत्रमा सुरक्षित एकीकृत बस्ती विकासको कार्यक्रम ल्याउन भट्टराईले माग गर्नुभयो ।
