काठमाडौं । प्रतिनिधि सभा सदस्य कल्पना मियाँले विश्व कीर्तिमानी पर्वतारोही निर्मल पुर्जाविरुद्ध अनावश्यक टिप्पणी नगर्न आग्रह गर्नुभएको छ ।
शुक्रबार प्रतिनिधि सभा बैठकको शून्य समयमा बोल्दै मियाँले संसद् भित्र संसदीय गतिविधि समेत देखाउन नसक्ने, बजेट भाषणको बेला संसद् भित्र रक्सी खाएर आउने सांसदहरूले उहाँ विरुद्ध नकारात्मक टिप्पणी गरेको भन्दै खरो आलोचना गर्नुभयो ।
देशलाई विश्वमा चिनाउने सफल कीर्तिमानी आरोहीविरुद्ध अनावश्यक टीकाटिप्पणी गर्ने छुट कसैलाई नभएको उहाँले बताउनुभयो । देशको गहनामाथि नियतवश अनावश्यक आरोप लगाएर विवादमा तान्न खोजिएको भन्दै उहाँले यस्तो कुरा स्वीकार्य नहुने बताउनुभयो । ‘निर्मल पुर्जा विरुद्ध अनावश्यक टिका टिप्पणी गर्न कसैलाई छुट छैन, अघिल्लो बजेटको बेलामा यही संसद् भित्र ती सांसदहरूले रक्सी खाएर आउनुभएको थियो, त्यो त हामीले कुरा निकालेनौँ त’, उहाँले भन्नुभयो ।
पत्रपत्रिका आएकै भरमा देशको एउटा गहनालाई अनावश्यक विवादमा पार्ने काम गर्न नहुने उहाँले बताउनुभयो । यस्ता कुरालाई रोक्न पनि उहाँले सम्बन्धित पक्षसँग माग गर्नुभयो ।
प्रतिनिधि सभामा कांग्रेस सांसद राजेन्द्र बजगाईँले यसअघि पुर्जालाई नेपालमा प्रवेश गर्न दिन नहुने अभिव्यक्ति दिनुभएको थियो । त्यस प्रति मियाँले गम्भीर आपत्ति जनाउनुभएको हो ।
