काठमाडाैं । नेपाली कांग्रेसका सांसद् हृदयराम थानीले कर्णालीकाे बाटाे स्तराेन्नतीका लागि पर्याप्त बजेट नछुट्याइए संसद् र मन्त्रालय घेराउ गर्ने चेतावनी दिनुभएकाे छ ।
मंगलबार बसेकाे प्रतिनिधि सभा बैठककाे आकस्मिक समयमा बाेल्दै सांसद् थानीले सुर्खेत-जुम्ला,कालीकाेट हुँदै हुम्लाबाट हिल्सा जाने बाटाे, जाजरकाेट-डाेल्पाकाे बाटाेका लागि अत्यन्तै न्यून बजेट छुट्याइएकाे भन्दै आपत्ति जनाउनुभयाे । 'यदि यही तरिकाले सरकार अघि बढे कर्णालीका सांसद्ले संसद् घेराउ गर्नुपर्नेछ, मन्त्रालय घेराउ गर्नुपर्नेछ, यी बाटाहरुमा बजेट छुट्याइएन भने हामी जुनसुकै मूल्य चुकाउन पनि तयार छाैं भन्ने कुरा सरकार, प्रधानमन्त्री र भाैतिक मन्त्रीलाई भन्न चाहान्छु'- उहाँले भन्नुभयाे ।
बजेट विनियाेजन गर्दा ध्यानाकर्षण गराएपनि नसमेटिएकाे सांसद् थानीले आपत्ति जनाउनुभयाे । 'भाैतिक मन्त्रालयकाे बजेट विनियाेजन गर्दा कर्णालीकाे राजमार्गमा हेरिदिनु भनेका थियाैं, त्यसमा पनि सुर्खेत-जुम्लाकाे बाटाे जहिले पनि मृत्यु मार्गकाे रुपमा रहन्छ, याे बाटाेका लागि अन्त्यन्त न्यू पैसा राखिएकाे छ, हामीले कहिलेसम्म मृत्युबरण गरिरहनुपर्ने हाे गाडीमा चढेका कारण ?' - उहाँकाे प्रश्न छ ।
कहिँ ६ त कहिँ ४ लाइन बाटाे भन्ने तर कर्णालीका जनता १ लाइन बाटाे नपाएर दुर्घटनामा पर्ने अवस्था रहेकाे सांसद्ले बताउनुभयाे । यसबारे ध्यानाकर्षण गराउँदा सरकार चुपचाप लागेर बसेकाे, आ-आफ्नाे निर्वाचन क्षेत्रमा बजेट खन्याउने तर कर्णालीका जनतालाई त्यही अवस्थामा राख्ने अवस्था कसरी आयाे भन्ने प्रश्न उहाँले गर्नुभयाे ।
कालीकाेट हुँदै हुम्लाबाट हिल्सा जाने बाटाेलाई पैसा अत्यन्त न्यून रहेकाे भन्दै सांसद् थानीले आपत्ति जनाउनुभयाे । हुम्लामा अहिले पनि गाडी नगएकाे अवस्था रहेकाे सांसद् थानीले बताउनुभयाे । हिल्लाबाट हिल्सासम्म गाडी आएकाे तर कालीकाेटदेखि हुम्लासम्म गाडी नपुग्नुकाे मर्म सरकारले बुझ्न नसकेकाे उहाँले बताउनुभयाे ।
यदि चीनबाट खाद्यान्न र वस्तु आएमा मुगु र जुम्लालाई सस्ताे पर्ने भएपनि अहिले रुपैडियाबाट खाद्यान्न बाेकेर मुगु पुर्याउने अवस्था रहेकाे सांसद् थानीले बताउनुभयाे । कर्णालीलाई गरिब प्रदेश भनेर हेपेकाे हाे भन्ने प्रश्न समेत उहाँले प्रश्न गर्नुभयाे ।
जाजरकाेट र डाेल्पाकाे बाटाेमा पनि बजेट न्यून रहेकाे र मदन भण्डारी राजमार्ग पूर्वतिरै हराएकाे सांसद् थानीले बताउनुभयाे । कर्णालीमा गाडीले मान्छे नभएर मान्छेले गाडी बाेक्ने अवस्था रहेकाे, एउटा गाडीलाई अर्काे गाडीले बाटाे छाेड्दा दुर्घटना हुने खतरा रहेकाे, गाडी चढ्दा सयाैं चाेटी भगवानकाे नाम जपेर हिँड्नुपर्ने अवस्था रहेकाे उहाँले बताउनुभयाे । 'गाडी धकेल्दै हामी कहिलेसम्म हिँडिरहने हाे ? समन्यायिक विकास भनेकाे यही हाे ?'- सांसद् थानीकाे प्रश्न छ ।
