काठमाडौं । प्रतिनिधि सभा बैठकमा सधैँ आफूलाई अरूभन्दा फरक रूपमा प्रस्तुत गर्न खोज्ने र आफूलाई हिरो ठान्ने प्रतिनिधि सभा सदस्य ज्ञानबहादुर शाही (ज्ञानेन्द्र शाही) मंगलबारको प्रतिनिधि सभा बैठकमा पनि त्यसै गरी प्रस्तुत हुँदै हुनुहुन्थ्यो ।
सधैँ सबैको विरोध गर्ने र आफूलाई मात्र हिरो हुँ भन्ने ठान्ने शाहीले प्रतिनिधि सभा बैठकमा आकस्मिक समय लिएर बोल्ने क्रममा कर्णालीलाई कम बजेट छुट्याएको र भौतिक पूर्वाधार तथा यातायात मन्त्री रघुवीर महासेठ तथा एमाले अध्यक्ष केपी शर्मा ओलीको जिल्ला झापामा धेरै बजेट छुट्याएको भन्दै मन्त्रीको आलोचना गर्नुभयो । उहाँले कर्णालीलाई उपेक्षा गर्नेलाई कर्णालीको सिञ्जाबाट उत्पत्ति भएको नेपाली भाषा नबोल्न चेतावनी दिनुभयो । त्यति मात्र होइन, कर्णालीलाई उपेक्षा गर्ने हो भने अब कर्णाली प्रदेशको क्षेत्रीय पार्टी बन्ने क्षेत्रीय र विखण्डनको चेतावनी समेत शाहीले दिनुभयो ।
त्यतिसम्म पनि सभामुखले सुनेरै बस्नु भएको थियो । समसामयिक आकस्मिक घटनाको विषयमा ध्यानाकर्षण गर्नको लागि दिइएको समयमा जब शाहीले कर्णालीको भूगोल र जनसङ्ख्या पढाउन लाग्नु भयो तब सभामुखले उहाँलाई रोक्न खोज्नुभयो । उहाँलाई सभामुखले विषयवस्तुमा केन्द्रित हुन निर्देश गर्नुभयो ।
शाही विषय बस्तुमा आउनुको सट्टा सभामुखसँगै विवाद गर्न लाग्नुभयो । उहाँले सभामुखलाई समेत धम्कीपूर्ण चेतावनीको भाषामा भन्नुभयो–‘होइन होइन, यो कर्णाली हो ।’
फेरि पनि सभामुखले उहाँलाई विषयवस्तुमा आउन आग्रह गर्नुभयो । तर शाही विषय बस्तुमा आउनुको सट्टा अझ हिरो पल्टन लाग्नुभयो । त्यस पछि सभामुखले उहाँको समय सकिएको घोषणा गर्नुभयो । तथापि शाही बोल्न नछाडे पछि सभामुखले उहाँको माइक काटिदिनुभयो ।
माइक काटेपछि शाही अझ हिरो पल्टिन खोज्नुभयो, आवाज काटिएकै माइक समातेर केही बेर बोल्नुभयो । त्यस पछि पनि माइक राखेर केही बेर बोलेर उठेर विरोध जनाउनुभयो । शाहीले अति गरेपछि सभामुखले बस्नको लागि रुलिङ गर्नुभयो । ‘माननीय सदस्य रुलिङ यही हो, आसन ग्रहण गरौँ ।’
सभामुखको रुलिङपछि शाहीले पछाडि हेर्नुभयो । उहाँको पक्षमा कोही सांसद देख्नु भएन । त्यस पछि थचक्क बस्नु भयो र प्रतिनिधि सभा बैठक अघि बढ्यो ।
