काठमाडाैं । स्वतन्त्र सांसद् अमरेशकुमार सिंहले प्रधानमन्त्री र मन्त्रीहरुका जिल्लामा मात्र बजेट छुट्याइएकाे भन्दै आपत्ति जनाउनुभएकाे छ ।
मंगलबार बसेकाे प्रतिनिधि सभा बैठककाे आकस्मिक समयमा बाेल्दै सांसद् सिंहले प्रधानमन्त्री, अर्थमन्त्री, नेकपा एमालेका अध्यक्ष केपी शर्मा ओली र मन्त्रीहरुकाे जिल्लामा मात्रै बजेट केन्द्रित भएकाे आराेप लगाउनुभयाे ।
सरकारकाे बजेट प्रधानमन्त्री र मन्त्रीका पुर्खाले अर्जेकाे सम्पत्ति नभएकाे उहाँले बताउनुभयाे । 'मैले बच्चामा नेपालका जिल्ला ७५ पढेर आएँ, संविधान बनाउँदा ७७ भयाे, तर यहाँ बजेट पढ्दा जिल्ला त जम्मा ८-१० वटा मात्रै रहेछ, तपाइँहरुकाे पुर्खाले अर्जेकाे सम्पत्ति हाे नेपाल सरकारकाे बजेट ?'-सांसद् सिंहकाे प्रश्न छ ।
बजेटमा विभेद भएको भन्दै उहाँले यसबारे प्रधानमन्त्री पुष्पकमल दाहाल प्रचण्डकाे जवाफ माग्नुभयाे । प्रधानमन्त्री र मन्त्रीकाे जिल्लामा मात्र बजेट लैजाने हो भने अर्को वर्षदेखि सदनमा बजेट सार्वजनिक गर्नुको कुनै औचित्य नहुने समेत सांसद् सिंहले बताउनुभयाे । प्रधानमन्त्रीको जवाफका लागि रुलिङ नभए बजेट पारित गर्ने दिन बैठक बहिष्कार गर्ने चेतावनी समेत उहाँले दिनुभयाे ।
