काठमाडाैं । राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानबहादुर शाहीले बजेटमा कर्णालीलाई हेपिएकाे भन्दै आपत्ति जनाउनुभएकाे छ ।
मंगलबार बसेकाे प्रतिनिधि सभा बैठकमा विनियाेजन विधेयकमाथि मन्त्रालयगत छलफलमा भाग लिँदै प्रमुख सचेतक शाहीले बजेटमा विभेद गर्न नपाइने बताउनुभयाे ।
उपप्रधान एवं भाैतिक पूर्वाधार तथा यातायात मन्त्री रघुवीर महासेठकाे एउटा जिल्लामा भन्दा कम बजेट कर्णालीलाई छुट्याइएकाे भन्दै उहाँले आपत्ति जनाउनुभयाे । बजेट प्रधानमन्त्री र मन्त्रीकाे पेवा नभएकाे भन्दै प्रमुख सचेतक शाहीले यसबारे बाेल्न र बजेट फेल गर्न कर्णालीका सत्तापक्षका सांसद्लाई आग्रह गर्नुभयाे ।
बजेट खाइदिनेलाई के भनाैं र खाेइ भन्ने गीतबाट सम्बाेधन सुरु गर्नुभएका शाहीले कर्णालीलाई बजेट नचाहिने भन्दै बजेट पुस्तिका सभामुखमार्फत अर्थमन्त्रीलाई फिर्ता गर्नुभयाे । 'यो बजेटमाथि सांसद्हरुले भोट हालेमा यो जुनीमा होइन अर्को जुनीमा पनि कर्णालीका जनताले सराप्ने छन्, म यो किताब मन्त्री जीलाई सिधै दिन मिल्दैन, म सभामुख मार्फत यो बजेट किताब जस्ताको तस्तै मन्त्री जीलाई दिन चाहन्छु, चाहिँदैन बजेट'- उहाँले भन्नुभयाे ।
भाैतिक महासेठले धनुषामा आफ्नो र श्रीमती जुलीकुमारी महतोको निर्वाचन क्षेत्रमा तथा एमाले अध्यक्ष ओलीको निर्वाचन क्षेत्र झापामा बढी योजना र रकम विनियोजन गरेको भन्दै प्रमुख सचेतक शाहीले यसबारे एमाले अध्यक्ष ओलीले जवाफ दिनुपर्ने समेत बताउनुभयाे ।
