काठमाडौं । प्रधानमन्त्री पुष्पकमल दाहालले सरकारले नेपालका सबै विमानस्थल सञ्चालनको तयारी गरिरहेको बताउनुभएको छ ।
बिहीबार प्रतिनिधि सभा बैठकमा सांसदहरूले उठाएको प्रश्नको जवाफ दिँदै दाहालले त्रिभुवन अन्तराष्ट्रिय विमानस्थलसँगै पोखरा र गौतम बुद्धलगायत तीनवटै अन्तर्राष्ट्रिय विमानस्थल सञ्चालनको लागि आवश्यक तयारी र समन्वयन गरिरहेको जानकारी दिनुभयो । पोखरा अन्तराष्ट्रिय विमानस्थल दिगो सञ्चालनका सम्बन्धमा सरोकारवालाहरूसँग छलफल र समन्वय गरी तदारुकताका साथ कार्य गरिरहेको उहाँले बताउनुभयो ।
अन्तर्राष्ट्रिय विमानस्थलहरू दिगो रूपमा सञ्चालन गर्न सार्वजनिक–निजी साझेदारीमा सञ्चालन र निर्माण सम्बन्धमा सुझाव पेश गर्न कार्य समिति गठन भएको दाहालले जानकारी दिनुभयो । ‘समितिको प्रतिवेदन तथा सिफारिस प्राप्त भएपछि अन्तराष्ट्रिय विमानस्थलहरू सार्वजनिक–निजी साझेदारी वा अन्य उपयुक्त सञ्चालनको विधि तयारी कार्यान्वयनमा ल्याइने छ’, उहाँले भन्नुभयो ।
वायु सेवा प्रदायकले पोखरा विमानस्थलबाट सेवा सञ्चालन गर्नका लागि विभिन्न छुटहरू तथा सहुलियतहरू माग गरेको हुँदा सो विषयमा समन्वय भइरहेको दाहालले जानकारी दिनुभयो ।
