काठमाडाैं । सहकारी संस्था बचत रकम दुरुपयोग सम्बन्धमा संसदीय छानबिन विशेष समितिको कार्यविधि, २०८१ तयार भएकाे छ ।
गत असार २ गते पारित भइसकेकाे साे कार्यविधि समितिले सार्वजनिक गरेकाे छ । कार्यविधिमा समितिका कार्यक्षेत्रहरु तोकिएकाे छ ।
कार्यक्षेत्र अनुसार समितिले सहकारी संस्थाहरूमा देखिएको संकट तथा यससँग जोडिएको कानुनी र संस्थागत प्रयोजन एवं वित्तीय प्रणालीको नियमन, सुपरिवेक्षण र पारदर्शिता सम्बन्धमा अध्ययन गरी सुझाव दिनेछ ।
समस्यामा परेका सहकारी संस्थाका बचतकर्ताको बचत रकमको सुरक्षा गर्न, जोखिममा रहेको तथा दुरुपयोग भएको बचत रकम छिटो र सहज ढंगले फिर्ता गर्न सकिने उपायका सम्बन्धमा अध्ययन गरी सिफारिस गर्नेछ ।
सहकारी संस्था अनुगमन, नियमन र सुपरिवेक्षण गर्ने मन्त्रालय, समस्याग्रस्त सहकारी व्यवस्थापन समिति, निकाय सम्बन्धित प्रदेश सरकारको विषय हेर्ने मन्त्रालय वा निकाय, सम्बन्धित स्थानीय तह र नेपाल राष्ट्र बैंकका जिम्मेवार अधिकारीसँग सोधपुछ र अन्तरक्रिया गरिने कार्यविधिमा उल्लेख छ ।
संकटग्रस्त सहकारी संस्थाका अध्यक्ष, सञ्चालक वा व्यवस्थापक र व्यवस्थापकीय भूमिकामा रहेका अन्य व्यक्ति, अनुसूची-२ मा उल्लिखित सहकारी संस्थाहरूबाट रकम प्रवाह भएका गोरखा मिडिया नेटवर्क प्रालिलगायत अन्य कम्पनी वा संस्थाहरूका तत्कालीन र वर्तमान सञ्चालक, व्यवस्थापक वा व्यवस्थापकीय भूमिकामा रहेका अन्य व्यक्तिहरूमाथि सोधपुछ गरिने पनि कार्यविधिमा उल्लेख छ ।
प्रतिनिधि सभाले गत जेठ १५ गते सहकारीको बचत ठगी प्रकरणमा छानबिन गर्न नेकपा एमालेका सांसद् सूर्य थापाकाे संयाेजकत्वमा संसदीय समिति गठन गरेको थियो । समितिमा एमालेबाट सांसद सरिता भुसाल पनि हुनुहुन्छ । प्रमुख प्रतिपक्षी नेपाली कांग्रेसबाट सांसद्हरू बद्रीप्रसाद पाण्डे र ईश्वरीदेवी न्यौपाने, नेकपा माओवादी केन्द्रबाट सांसद्हरु लेखनाथ दाहाल, राष्ट्रिय स्वतन्त्र पार्टी (रास्वपा) बाट शिशिर खनाल र राष्ट्रिय प्रजातन्त्र पार्टी (राप्रपा) बाट ध्रुवबहादुर प्रधान सदस्य हुनुहुन्छ ।
समितिकाे पाँचाैं बैठक बसिसकेकाे छ । असार ५ गते बसेकाे पाँचाैं बैठकमा समितिले नेपाल कानुन आयोगका सचिव तोयानाथ अधिकारी, सहसचिव पाराश्वर ढुंगाना र कानुन मन्त्रालयका सहसचिव मानबहादुर अर्यालसँग विशेष छानबिन समितिको तोकिएको क्षेत्राधिकार तथा विभिन्न तह मातहतका सहकारीहरूको अध्ययन र छानविनसम्बन्धी स्पष्टताबारे परामर्श, छलफल र अन्तर्क्रिया गरेकाे थियाे ।
हेर्नुस् कार्यविधिकाे पूर्णपाठ:
