काठमाडौं । प्रतिनिधि सभा सदस्य प्रदीप पौडेलले औपचारिक कार्यक्रममा गमलाको फूलमा पानी हालेर चुरेको जंगल संरक्षण नहुने बताउनुभएको छ ।
आइतबार प्रतिनिधि सभा बैठकमा बोल्दै पौडेलले चुरे संरक्षणको लागि राष्ट्रव्यापी वृक्षारोपण अभियान चलाउनु पर्ने बताउनुभयो । ‘गमलामा बिरुवा रोपेर चुरेको संरक्षण हुँदैन, चुरे दिवसको दिन एउटा बिरुवा रोपेर पनि चुरेको संरक्षण हुन सक्दैन, चुरेको संरक्षण गर्ने हो भने बिरुवा रोप्ने अभियान सरकारले सुरु गर्न जरुरी छ, सबै राजनीतिक दलका कार्यकर्ताले बिरुवा रोप्ने अभियान सञ्चालन गर्न आवश्यक छ, एकैदिनमा हजारौँ बिरुवा रोप्न सक्यौँ, इलामदेखि कञ्चनपुरसम्म करोडौँ बिरुवा रोप्न सक्यौँ भने मात्रै चुरेको संरक्षण हुन सक्छ’, उहाँले भन्नुभयो ।
चुरे संरक्षणको विषयलाई सरकारले विशेष विषय बनाउन आवश्यक रहेको पौडेलले बताउनुभयो । वन तथा वातावरण मन्त्रालयले यसलाई विशेष ध्यान दिनु पर्नेमा उहाँले जोड दिनुभयो ।
चुरे मानवीय दुष्चक्रको चपेटामा परेको पौडेलको भनाइ छ । नदी प्रणाली र वातावरणीय अखण्डतामा गम्भीर प्रभाव परेको उहाँले प्रष्ट पार्नुभयो । चुरे दोहनलाई टुलुटुलु नहेर्न उहाँले सरकारसँग आग्रह गर्नुभयो ।
चुरे संरक्षणको माग राख्दै एक महिनादेखि माइतीघरमा धर्ना बसेका सप्तरीका नागरिकको माग सुन्न उहाँले सरकारलाई आग्रह गर्नुभयो । सरकारको कुनै पनि प्रतिनिधिले उहाँहरूको माग सुनुवाइ नगरको प्रति उहाँले आपत्ति जनाउनुभयो । यो विषय कुनै व्यक्ति विशेषको विषय नभएर इलामदेखि कञ्चनपुरसम्मका नागरिकको मुद्दा भएको पौडेलले स्पष्ट पार्नुभयो ।
चुरे संरक्षण समितिले १५ अरब रुपैँया खर्च गरेको भए पनि संरक्षणको कुनै काम हुन नसकेको बताउनुभयो । यस्तै अवस्था हो भने केही वर्षमा नै मधेस मरुभूमि बन्ने तर्फ उहाँले ध्यानाकर्षण गराउनुभयो ।
