काठमाडौं । प्रतिनिधि सभा सदस्य डा. आर्जु राणाले देशमा अझै पनि छाउपडी प्रथा नरोकिएको भन्दै सरकारको ध्यानाकर्षण गराउनुभएको छ ।
आइतबार प्रतिनिधि सभा बैठकको शून्य समयमा बोल्दै देउवाले महिनावारिको बेला महिलाहरू छाउ गोठमा बास्दा असुरक्षित हुने गरेका बताउनुभयो । छाउ गोठमा बस्दा सर्पले टोक्ने तथा बलात्कारको घटनामा पर्ने सम्मका जोखिम महिलाहरूलाई भएको उहाँले सुनाउनुभयो ।
असार ३ गते मात्र अछाममा छाउ गोठमा बसेकी एक छोरी बलात्कारको सिकार भएको उहाँले बताउनुभयो । ‘सरकारले २०७५ देखि २०७८ को बिचमा ७ हजार ५ सय ४५ वटा छाउ गोठ भत्काए पनि यो कुरीति अझै पनि चलिरहेको छ’, उहाँले भन्नुभयो ।
छाउपडी प्रथाको विरुद्ध क्याम्पियनकै रूपमा प्रचार अभियान चलाउन उहाँले सरकारको ध्यानाकर्षण गराउनुभयो । विद्यालय तह देखिनै महिनावारिको विषयमा विद्यार्थीलाई जानकारी दिन आवश्यक रहेको उहाँले बताउनुभयो ।
