काठमाडौं । प्रतिनिधि सभा सदस्य ठाकुर गैरेले भ्रष्टाचार न्यूनीकरणको लागि थप निर्मम हुन आवश्यक रहेको बताउनुभएको छ ।
सोमबार प्रतिनिधि सभा बैठकको शून्य समयमा बोल्दै गैरेले व्याप्त भ्रष्टाचारको कारण सबैको सीर निहुरिने अवस्था आएको बताउनुभयो । ‘माथि भन्नुस्, माथिको आदेश छैन, माथि मिलाउनु पर्छ, भोलि आउनुस् जस्ता स्वरहरूले आम सेवाग्राहीलाई आजित बनाइरहेको छ’, गैरेले भन्नुभयो ।
कर्मचारी प्रशासनका प्रमुख व्यक्ति मुख्य सचिव नै भ्रष्टाचारको मुद्दामा पर्नुले नेपालमा भ्रष्टाचारको अवस्था कस्तो छ भन्ने कुरा पुष्टि गरेको गैरेले बताउनुभयो । यसले सिङ्गो सेवा क्षेत्र कस्तो अवस्थामा रहेछ भन्ने कुरा देखाएको उहाँको धारणा छ ।
निजामती प्रशासनबाट मात्र यस्ता कुरा सम्भव छ वा यसमा राजनीतिक संलग्नता पनि छ भन्ने कुरा गहिराइमा पुगेर हेर्नुपर्नेमा उहाँले जोड दिनुभयो । यसमा राजनीतिक नेतृत्व र अन्य क्षेत्रका संलग्नताको बारेमा खोजी गर्न ढिला गर्नु नहुने उहाँले सुझाव दिनुभयो ।
