काठमाडाैं । महिला, बालबालिका तथा ज्येष्ठ नागरिक मन्त्री भगवती चौधरीले विनियोजन विधेयकमाथिकाे छलफलका क्रममा केही सांसद्ले सदनमा दिएकाे अभिव्यक्तिप्रति आपत्ति जनाउनुभएको छ ।
साेमबार बसेकाे प्रतिनिधि सभा बैठकमा आगामी आर्थिक वर्षका लागि मन्त्रालयले विनियोजन गरेको बजेटमाथि सांसद्हरुले उठाएका प्रश्नको जवाफ दिने क्रममा मन्त्री चाैधरीले आपत्ति जनाउनुभयाे ।
केही पुरुष सांसद्ले दिएकाे अभिव्यक्तिले सम्पूर्ण महिलाको आत्मसम्मान र मर्यादालाई अवमूल्यन गरेको उहाँले बताउनुभयाे । मन्त्री चौधरीले भन्नुभयो - '०८१ जेठ ३९ गते सदनमा संवाेधन गर्ने क्रममा केही माननीयहरूले महिलाहरू असक्षम र संकीर्ण सोच भएका हुन्छन् भन्ने मन्तव्य, सम्भवतः पुरुष मन्त्री भएको भए यो अवस्था हुँदैनथ्यो भन्ने गरी दिएको अभिव्यक्ति तथा वैवाहिक बलात्कार जस्तो जघन्य अपराधका बारेमा बोल्दै गर्दा महिलाहरूलाई कसैको रहर पूरा गर्न मनोरञ्जनको साधन तथा उपभोग्य वस्तुको रूपमा मात्र चित्रण गरिने गरी दिएको अभिव्यक्तिले सम्पूर्ण महिलाको आत्मसम्मान र मर्यादालाई अवमूल्यन गरेको छ ।'
महिलालाई हेर्ने यस प्रकारको विभेदकारी तथा संकीर्ण सोच सबैकाे साझा शत्रु भएकाे भन्दै मन्त्री चाैधरीले यसलाई परास्त गर्नु सबैकाे साझा कर्तव्य भएकाे बताउनुभयाे । आफूले दिएका अभिव्यक्तिप्रति आत्माआलोचित हुन उहाँले सम्बन्धित सांसद्लाई आग्रह गर्नुभयाे । मन्त्री चाैधरीले भन्नुभयाे - 'यसले हामीले सुधार गर्नुपर्ने भनी प्राथमिकतामा राखेका हानिकारक अभ्यासहरूलाई नै मलजल गर्ने कार्य गरेको महशुस भएको छ, यस प्रकारका अभिव्यक्तिबाट आम महिलाको आत्मसम्मानमा पुगेको चोटप्रति सम्बन्धित माननीय ज्युहरू आत्मा आलोचित हुनुहुनेछ भन्ने विश्वास लिएको छु'- मन्त्री चाैधरीले भन्नुभयाे ।
विद्यालयकाे पाठ्यक्रममा नैतिक शिक्षा राख्नुपर्ने उहाँले बताउनुभयाे । संसद्मा बोलिने भाषाहरूप्रति जोकोही सचेत हुनुपर्ने पनि मन्त्री चाैधरीले बताउनुभयाे ।
मन्त्री चौधरीले महिला मन्त्रालयको प्रमुख जिम्मेवारी महिला बालबालिका एवं ज्येष्ठ नागरिकको संरक्षण सुरक्षा र कल्याण गर्नु भएको बताउनुभयाे । धेरै दशकदेखि बलियो र सुदृढ रहेको विभाग नै खारेज गर्नाले महिला बालबालिका र ज्येष्ठ नागरिकलाई मात्र नभइ नेपालको विकासलाई नै ठेस पुर्याएकाे भन्दै उहाँले सरकारले यसकाे महशुस गरेकाे बताउनुभयाे ।
शिशु स्याहारकाे बजेट गत वर्ष ८० लाख भएकाेमा याे वर्ष ७० लाख भएकाे भन्दै मन्त्री चाैधरीले स्राेतकाे कमीले बजेट घटेकाे बताउनुभयाे ।
आवश्यकताका आधारमा बजेट विनियोजन गरिएको भन्दै उहाँले मन्त्रालयकाे बजेटमा सबै सांसद्लाई समेट्ने प्रयास गरेकाे बताउनुभयाे । छुटेकाहरुलाई पनि सकेसम्म सम्बाेधन गर्ने प्रतिबद्धता मन्त्री चाैधरीले जनाउनुभयाे ।
