काठमाडौं । प्रतिनिधि सभा सदस्य देवेन्द्र पौडेलले परीक्षा मापन भए पनि शिक्षण संस्थामा हार जितको कुरा गर्नु ठिक नहुने बताउनुभएको छ ।
बिहीबार प्रतिनिधि सभा बैठकको विशेष समयमा बोल्दै पौडेलले एसईई परीक्षामा पास र फेलको कुरा गर्दा युवा विद्यार्थीको मनोबल गिर्ने बताउनुभयो । शिक्षण संस्थामा अपुग भएका कुरालाई व्यवस्थापन गर्दै विद्यार्थीको सिकाइलाई सक्रिय बनाउने कुरामा सरकार लाग्नु पर्नेमा उहाँले जोड दिनुभयो ।
पौडेलले १२ कक्षा पास गरेका विद्यार्थीलाई नेपालमा नै उनीहरूले खोजेको जस्तो शिक्षा दिन सकिन्छ भन्ने आत्मविश्वास नेपालका विश्वविद्यालयले दिन आवश्यक रहेको उहाँले बताउनुभयो । त्यसो गर्न सक्ने हो भने विदेश पढ्न जाने विद्यार्थीको चाप घटाउन सकिने उहाँले प्रष्ट पार्नुभयो । यस विषयमा सम्बन्धित निकायलाई विशेष निर्देशन दिन उहाँले सभामुखलाई अनुरोध गर्नुभयो । ‘शिक्षामा आशा जागृत गर्नको निम्ति विशेष निर्देशन दिनुहुन म अनुरोध गर्दछु’, उहाँले भन्नुभयो ।
धेरै असन्तुष्टि र गुनासाका बिचमा पनि सहज वातावरणमा आउने आर्थिक वर्षको बजेट पास भएको उहाँले स्मरण गराउनुभयो । बजेट कार्यान्वयनको प्रक्रियामा तत्काल अघि बढ्नु पर्ने उहाँले बताउनुभयो । अहिले बजेट पास हुने, एक वर्ष पछिको असारमा काम हुने, छिटो छिटो काम गरेर राम्रो भए पनि नराम्रो भए पनि पास गर्ने प्रवृत्तिलाई अन्त्य गर्नुपर्नेमा उहाँले जोड दिनुभयो ।
विपत् व्यवस्थापनको विषयमा पनि सरकारको गम्भीर ध्यान जानु पर्नेमा उहाँले जोड दिनुभयो । बाढी पहिरोमा परेका मानिसहरूको उद्धार र उपचारमा सहजता पुर्याउन हेलिकप्टर व्यवस्था गर्नुपर्ने उहाँले माग गर्नुभयो ।
उहाँले विपद्को उद्धार र सहयोगमा सुरक्षाकर्मीसँगै पार्टीका कार्यकर्ता पनि खटाउनु पर्ने उहाँले सुझाव दिनुभयो । सुरक्षाकर्मीले मात्र विपदमा उद्धारको काम गर्न नसक्ने पौडेलले बताउनुभयो ।
उखु किसानको रकम पनि तत्काल भुक्तानी गर्न उहाँले सरकारसँग माग गर्नुभयो । किसानलाई सहज रूपमा सहुलियत ऋण उपलब्ध गराउने व्यवस्था सरकारले मिलाउनु पर्ने पौडेलले बताउनुभयो ।
बाँझो रहेका सार्वजनिक जग्गालाई कानुन बनाएर बन्दाबन्दी खेतीमा लगाउनु पर्ने उहाँले सुझाव दिनुभयो । यसो नभए नेपालको खेती परम्परागत खेती प्रणालीमा नै सीमित रहने उहाँले प्रष्ट पार्नुभयो ।
