काठमाडौं । प्रतिनिधि सभा सदस्य ठाकुर गैरेले तीनवटै तहका सरकारको नीति, कार्यक्रम र बजेट बनाउने क्रममा धेरै असङ्गति र अराजकता देखिएको बताउनुभएको छ ।
बिहीबार प्रतिनिधि सभा बैठक बोल्दै गैरेले यसमा सरकारको ध्यान जानु पर्ने बनाउनुभयो । सरकारको नीति, कार्यक्रम र बजेटमा जति छलफल नगरी कुनै परिवर्तन नगरी पास गरिएको भन्दै उहाँले आलोचना गर्नुभयो । प्रदेशमा प्रस्तुत भएका नीति कार्यक्रम र बजेटको अवस्था पनि त्यस्तै रहेको उहाँले बताउनुभयो ।
स्थानीय तहले असार १० गते भित्र सभामा बजेट तथा कार्यक्रम पेस गर्नु पर्नेमा अझै पनि ४२/४३ वटा स्थानीय तहमा बजेट नै पेस नभएको उहाँले सुनाउनुभयो । ‘कतिपय स्थानीय तहमा कुर्सी तोड्न जस्ता अराजक व्यवहार देखियो’, गैरेले भन्नुभयो ।
केन्द्रदेखि तलसम्म बजेटको प्राथमिकता र कार्यान्वयन क्षमतामा नै प्रश्न उठेको उहाँले बताउनुभयो । संविधानको पालना, संघीय शासन शासन व्यवस्थाको कार्यान्वयन लगायतका विषयमा एक पटक नयाँ ढङ्गले बहस गर्न आवश्यक रहेको उहाँले बताउनुभयो ।
संघीय शासन प्रणालीको भावनालाई, जनअपेक्षालाई र संवैधानिक व्यवस्थालाई हेर्ने हो भने स्थानीय तहले असार १० गते बजेट ल्याउनु पर्ने उहाँले बताउनुभयो । केही स्थानीय तहले कानुनी व्यवस्थालाई नै चुनौती दिएको गैरेको भनाइ छ । ‘देशमा संविधान र कानुनको उलङ्घन हुने परिस्थित आउँदा हामी मूकदर्शक बन्न मिल्छ वा त्यसको समाधान गर्नुपर्दछ ?’ उहाँले प्रश्न गर्नुभयो ।
यस्ता समस्या समाधान नगरेर छाडिदिने हो भने देशमा भयङ्कर अराजकता पैदा हुने उहाँले बताउनुभयो । यसले देशको संविधान र कानुनको पालना नहुने स्थिति आउने तर्फ गैरेले सचेत गराउनुभयो ।
केन्द्र प्रदेशमा योजना आयोग र स्थानीय तहमा टोल विकास संस्था रहेको भए पनि ती निकायसँग कुनै समन्वय नभएको उहाँले बताउनुभयो । यसले गर्दा प्राथमिकता योजना नपरेर झ्यालबाट आउने योजना स्थानीय तहदेखि केन्द्रसम्म पर्ने गरेका भन्दै उहाँले आपत्ति जनाउनुभयो । यो तरिकाले सुखी नेपाली, समृद्ध नेपालको अपेक्षा पुरा नहुने र देश पनि समाजवादको बाटो तर्फ अघि नबढ्ने उहाँले प्रष्ट पार्नुभयो ।
