काठमाडौं । प्रतिनिधि सभा सदस्य डा. तोसिमा कार्कीले नेपालका स्वास्थ्य संस्थाहरू अहिले पनि स्वास्थ्यकर्मी सुरक्षित नभएका बताउनुभएको छ ।
बिहीबार प्रतिनिधि सभा बैठकमा बोल्दै कार्कीले उपचारको क्रममा कुनै बिरामीको ज्यान गयो भने चिकित्सकहरूलाई जम्मा भएको भिडले अपराधीलाई जस्तो व्यवहार गर्ने गरेको बताउनुभयो । कानुनी रूपमा उनीहरूको सुरक्षाको प्रत्याभूति भएको भए पनि व्यवहारमा त्यो कार्यान्वयनमा आउन नसकेको उहाँले प्रष्ट पार्नुभयो ।
कानुन बने पनि स्वास्थ्य संस्थामा तोडफोड हुने र स्वास्थ्यकर्मी माथि आक्रमण हुने घटना नरोकिएको भन्दै कार्कीले चिन्ता व्यक्त गर्नुभयो । स्वास्थ्यकर्मीलाई हत्याराको ट्याग लगाउन भिडले होडबाजी गर्ने गरेको प्रति उहाँले ध्यानाकर्षण गराउनुभयो ।
उहाँले स्वास्थ्य संस्थालाई शान्ति क्षेत्र घोषणा गरेर स्वास्थ्यकर्मीलाई शान्तिपूर्ण तरिकाले काम गर्ने अवसर सिर्जना गर्नुपर्नेमा जोड दिनुभयो । ‘कापी रहेको हातले उपचार गर्न सक्दैन, डराएको मस्तिष्कले उपचार गर्न सक्दैन’ उहाँले भन्नुभयो ।
जसरी सुरक्षाकर्मीलाई हातपात गर्नेलाई पहिला कस्टडीमा लगेर अनुसन्धान सुरु हुन्छ त्यसै गरी स्वास्थ्यकर्मी माथि हातपात गर्नेलाई पनि पहिला कस्टडीमा लगेर अनुसन्धान सुरु गर्नुपर्ने उहाँले माग गर्नुभयो । कुनै पनि विषयमा भिडले निर्णय गर्ने होइन, विधि प्रक्रियाले निर्णय गर्नुपरे कार्कीले बताउनुभयो ।
