काठमाडाैं । नेकपा एमालेका सांसद् अच्युतप्रसाद मैनालीले देशभरका २ सय ५९ पालिकामा प्रमुख प्रकाशकीय अधिकृत नखटिँदा सेवा प्रवाहमा समस्या भइरहेको बताउनुभएकाे छ ।
बिहीबार बसेकाे प्रतिनिधि सभा बैठककाे विशेष समयमा बाेल्दै सांसद् मैनालीले कनिष्ठ कर्मचारीलाई निमित्त दिएर पठाउँदा स्थानीय सरकारमा बेथिति भइरहेको बताउनुभयाे ।
स्थानीय सरकारकाे धारा प्रमुख प्रशासकीय अधिकृत नभएकाे अवस्थामा संघीय मामिला तथा सामान्य मन्त्रालयबाट प्रमुख प्रशासकीय अधिकृत खटाइने उल्लेख भएपनि सरकारले ध्यान नदिएकाे उहाँले बताउनुभयाे । सांसद् मैनालीले भन्नुभयाे - 'तर आज २ सय ५९ पालिकामा कार्यकारी अधिकृत अधिकृतहरु खटिएकाे अवस्था छैन, उपसचिव स्तरका कर्मचारीहरु उपत्यका छाडेर नजाने मन्त्रालयमै बस्ने उनीहरुलाई सरकारले विशेष सुविधा दिएर राख्ने, त्याे ठाउँमा कनिष्ठ कर्मचारीलाई निमित्तकाे रुपमा खटाएर आज स्थानीय सरकारमा बेथिति भएकाे छ, आर्थिक अनुशासनकाे पालना भएकाे छैन, याे विषयमा हामीले पटकपटक मन्त्रालयमा गएर कुरा राख्याैं तर माननीय मन्त्री र सचिव ज्यू निरिह हुनुहुन्छ ।'
अरु क्षेत्रका पालिका निमित्त कर्मचारी पठाउन सांसद्हरुकाे दाैडधुप चल्ने गरेकाे उहाँले बताउनुभयाे । सप्तरीकाे डाक्नेश्वरीका कार्यकारी नबस्दा काम हुन नसकेकाे र विकल्प पनि दिन नसकेकाे सांसद् मैनालीले बताउनुभयाे । तर बारामा काम गरिराखेकाे कर्मचारीलाई सरुवा गरिएकाे बताउनुभयाे ।
स्थानीय सरकारलाई विपद् व्यवस्थापनसहित २२ वटा अधिकार दिइएकाे उहाँले बताउनुभयाे । असार १० मा ल्याइसक्नुपर्ने बजेट कतिपय पालिकाले अझै बजेट ल्याउन नसकेका उहाँले बताउनुभयाे ।
