काठमाडाैं । नेपाली कांग्रेसका सांसद् मोहनबहादुर बस्नेतले टेरामक्स प्रणाली भित्र्याएर आफूले टेलिफाेनमा कल बाइपास गरेर (भिओआइपी) खाने धन्दा राेक्ने काम गरेकाे दाबी गर्नुभएकाे छ ।
शुक्रबार बसेकाे प्रतिनिधि सभा बैठकको विशेष समयमा सांसद् बस्नेतले कल बाइपास गरेर अर्बौं रुपैयाँ घोटाला हुने गरेको कुरालाई रोक्न टेरामक्स प्रविधि भित्र्याएको दाबी गर्नुभयाे । नेपाल दुरसञ्चार प्राधिकरणको साे टेरामक्स प्रणाली भिओआइपी प्रकरणलाई रोक्ने विधि भएको उहाँले बताउनुभयाे ।
कल बाइपास गरेर वार्षिक रुपमा २५ अर्ब घोटाला हुने गरेकोमा टेरामक्स प्रणालीपछि सो घोटाला रोकिएको सांसद् बस्नेतले दाबी गर्नुभयाे । 'टेरामक्स यस्ताे प्रविधि हाे जसले टेलिफाेनमा कल बाइपास गरेर खाने धन्दा अर्थात भिओआइपी प्रकरणलाई नियन्त्रण गर्छ, संसारभर यही विधिले नियन्त्रण गरेकाे छ, नेपाल मात्रै एउटा यस्तो देश हो जहाँ कल बाइपास गरेर वर्षको २५ अर्ब बढी राजश्व घोटाला नेपालमा भएको छ, यदि टेरामक्स भन्ने विधि भिओआइपीलाई राेक्ने विधि हाेइन भने विधि के हाे त ? मैले आँट गरेर याे विधि सुरुआत गर्न खाेजेकाे हूँ'- उहाँले भन्नुभयाे ।
टेरामक्स नेपालमा अर्बौ रुपैयाँ राजश्व जोगाउने मन्त्र भएकाे सांसद् बस्नेतले दाबी गर्नुभयाे । '२५ अर्ब बार्षिक घोटाला गर्नेले कति अर्ब खर्च गरेर सम्बन्धित निकायलाई ढाकछोप गर्ने ? थेग्ने अथवा डाइर्भट गर्न खोजेको हो ? यो भविष्यले बताउला, टेरामक्स नेपालका लागि अर्बौ रुपैयाँ राजश्व जोगाउने मन्त्र हो, फर्मुला हो, यो नभएसम्म कल बाइपास गरेर खाने काम भइरहन्छ'- उहाँले भन्नुभयाे ।
टेरामक्समा आफूलाई पनि मुछिएकाे भन्दै सांसद् बस्नेतले समय आएपछि उचित जवाफ दिने बताउनुभयाे । 'टेरामक्समा मेराे पनि नाम जाेडिएकाे छ, हुन त यसमा ३ जना सांसद्को नाम मुछिएको छ, यसको बारेमा कुरा उठाउने गरेका छन् बेलाबेलामा, कलिला-कलिला ओठ निचाेर्दा दूध आउने माननीयदेखि लिएर दाह्री जुँगा फुलेकासम्म सबैले याे कुरा उठाउनुभएकाे छ, उचित दिन आएछ भने मैले यसकाे जवाफ दिनेछु'- उहाँले भन्नुभयाे ।
सांसद् बस्नेतले एनसेल कालोबजारी गर्ने ठूलो संस्था भएको पनि बताउनुभयाे ।
