काठमाडौं । उपप्रधान तथा गृह मन्त्री रवि लामिछानेले राष्ट्रिय परिचयपत्र व्यक्तिका सबै डकुमेन्टलाई एकै ठाउँमा व्यवस्थित गर्ने अभिप्रायले ल्याएको बताउनुभएको छ ।
सोमबार प्रतिनिधि सभा बैठकमा सांसद्हरुले सोध्नु भएको प्रश्नको जवाफ दिँदै लामिछानेले एउटै मात्र वैध परिचयपत्र हुँदा नागरिकलाई सजिलो हुन्छ भनेर सो परिचयपत्र ल्याएको बताउनुभयो । उहाँले सामाजिक सुरक्षा भत्ता लिने नागरिकले भदौ मसान्तसम्म राष्ट्रिय परिचयपत्रको लागि विवरण भर्नुपर्ने पर्ने जानकारी दिनुभयो । ‘भदौ मसान्तसम्म राष्ट्रिय परिचयपत्रको विवरण भर्ने नागरिकहरू राज्यले दिने सेवा सुविधाबाट वञ्चित हुनु पर्दैन’, उहाँले भन्नुभयो ।
कसैको भदौ मसान्तसम्म पनि विवरण भराउन छुटको रहेछ भने पनि राज्यबाट पाउने सुविधाबाट नागरिक वञ्चित नहुने उहाँले प्रष्ट पार्नुभयो । त्यसैले भिडभाड गर्नुपर्ने र तत्काल गर्नुपर्ने आवश्यकता नरहेको लामिछानेले बताउनुभयो । ‘यदि छुट्यो भने पनि राज्यले तपाईँलाई तपाईँका अधिकारबाट वञ्चित गर्दैन’, उहाँले भन्नुभयो ।
