काठमाडौं । प्रतिनिधि सभा सदस्य राजेन्द्र बजगाईँ प्रधानमन्त्री पुष्पकमल दाहालको सरकार अल्पमतमा र दबाबमा रहेकोले केही काम गर्न नसक्ने बताउनुभएको छ ।
आइबार प्रतिनिधि सभा बैठकमा बोल्दै बजगाईँले देश प्राकृतिक विपत्तिमा परेको भए पनि सरकारले केही काम गर्न नसकेको र नगर्ने बताउनुभयो । प्रधानमन्त्रीले विश्वासको मत लिने दिन असार २८ सम्म कुर्नुको विकल्प नभएको बजगाईँले प्रष्ट पार्नुभयो । ‘२८ गतेसम्म कुर्नु पर्ने छ, यो सरकार कतै टिकिहाल्छ कि भन्ने कुरामा उहाँ केन्द्रित हुनुपर्ने छ, यो बाढी पहिरोमा उहाँ केन्द्रित हुन सक्नुहुने छैन’, उहाँले भन्नुभयो ।
नेपालको सरकार र राजनीतिज्ञको ध्यान देश बनाउन केन्द्रित नभएको उहाँले बताउनुभयो । ‘नेपालका राजनीतिक दलहरूको ध्यान नेपाल बनाउने तिर छैन भन्ने कुरा मैले निश्चय गरेको छु’, उहाँले भन्नुभयो ।
